Maharashtra Politics : शपथविधीचा मुहूर्त ठरला, दबाव टाळला; भाजपची एकनाथ शिंदेंवर कुरघोडी? पाहा स्पेशल रिपोर्ट

भरत मोहळकर, साम टीव्ही

मुंबई : विधानसभा निवडणुकीत स्पष्ट बहुमत मिळाल्यानंतर सत्ता स्थापनेसाठी अमित शाहांसोबत एकनाथ शिंदे, अजित पवार आणि देवेंद्र फडणवीस यांच्यात बराच खल झाला. मात्र मुख्यमंत्रिपदासह महत्वाच्या खात्यांवरून महायुतीत तिढा कायम आहे. त्यातच आता भाजपने परस्पर शपथविधीची तारीख आणि वेळ जाहीर करून एकनाथ शिंदेंकडून वापरण्यात येत असलेलं दबावतंत्र झुगारल्याची चर्चा रंगलीय.. तर शपथविधीची तारीख जाहीर करण्यावरून शिंदे गटाने भाजपला खोचक टोला लगावलाय.

छोट्या मित्रपक्षांसह भाजपची संख्या 137 वर पोहचलीय.. अजित पवारांनीही भाजपला पाठींबा दिलाय.. मात्र शिंदेंनी मुंबईतील बैठका रद्द करून दरे गावी जाण्याचा निर्णय घेत दबावतंत्र वापरल्याचं म्हटलं जात होतं. दुसरीकडे भाजपने शपथविधीची वेळ जाहीर करून शिंदेंना सूचक इशारा दिल्याचं म्हटलं जातं.

एकनाथ शिंदेंना भाजपचा सूचक इशारा

सरकारमध्ये सहभागी होण्याचा शिंदेंना भाजपकडून संदेश?

शिंदेंची गृहमंत्रिपदासह अन्य महत्त्वाच्या खात्यांची मागणी-सूत्र

गृहखातं कोणत्याही परिस्थितीत सोडणार नाही-भाजप

शिंदेंच्या दबावात येणार नसल्याचा भाजपचा सूचक इशारा?

भाजपने मुख्यमंत्रिपद जाहीर न करताच शपथविधीची तारीख जाहीर केल्याच्या मुद्द्यावर शिंदेंनी सावध प्रतिक्रीया दिलीय. शपथविधीची तारीख ठरली असली तरी दिल्लीतील बैठकीनंतरच मंत्रिपदांचं वाटप होणार असल्याचं मुख्यमंत्री शिंदेंनी म्हटलंय.. मात्र आता भाजपने दबावतंत्र झुगारून शपथविधीची तारीख जाहीर केल्याने हा यापुढे शिंदेंना सन्मानजनक खाती मिळणार की भाजपला मिळालेल्या बहुमतामुळे एकनाथ शिंदेंची महायुतीत फरफट होणार? याकडे लक्ष लागलंय.