BJP vs Shivsena : श्रीकांत शिंदेंच्या मतदारसंघात भाजप-शिवसेनेत तणाव, भाजप आमदाराच्या टीकेनंतर शिंदे गट आक्रमक

अभिजीत गायकवाड

Kalyan News :

कल्याण लोकसभा मतदारसंघातील भाजप-शिवसेनेतील धुसफूस संपण्याचं नाव घेत नाही. शिंदे गट आणि भाजपमधील तणाव कमी होण्याऐवजी दिवसेंदिवस वाढतच चालला आहे.

कल्याणमध्ये शिवसेना शिंदे गटापुढे भाजपचं काहीच चालत नाही, असा आरोप भाजपचे स्थानिक आमदार गणपत गायकवाड यांनी केला होता. भाजप आमदार गणपत गायकवाड यांच्या आरोपानंतर शिवसेना शिंदे गट आक्रमक झाला आहे. (Latest Marathi News)

खासदार श्रीकांत शिंदे यांच्या कल्याण लोकसभा मतदार संघातील शिवसेना शिंदे गट-भाजपमध्ये तणाव वाढला आहे. भाजप आमदार गणपत गायकवाड यांची नार्को टेस्ट नाही तर सायको टेस्ट करा, अशी टीका शिवसेना शिंदे गट शहर प्रमुख महेश गायकवाड यांनी केली आहे.

महेश गायकवाड यांनी पुढे म्हटलं की, धनुष्यबाण आमचा स्वाभिमान आहे. धनुष्यबाणावर टीका करू नका, तुमचं रॉकेट जनता कोणत्या जागेत घालेल हे सांगता येणार नाही. पोलीस प्रोटेक्शन बद्दल बोलताय तर आमदार गायकवाड यांच्या दोन्ही मुलांना पोलीस प्रोटेक्शन, पोलीस घराबाहेर बसलेले असतात.

कल्याण पूर्व मतदारसंघात विकास नाही तर फक्त भ्रष्टाचार झाला आहे. खोटे नाटे आरोप करत प्रसिद्धी मिळवण्याचा आमदार गणपत गायकवाड यांचा प्रयत्न आहे. आमदार गायकवाड युतीत काडी घालण्याचा प्रयत्न करत आहेत. आम्ही युती धर्म पाळतोय आणि पालन करत राहणार, असंही महेश गायकवाड यांनी म्हटलं.