Laundry Price Hike : इस्त्रीच्या कपड्यांनाही महागाईचा शॉक, ड्रायक्लिनिंग आणि धुलाईच्या किंमतीतही वाढ

मयुरेश कडव, बदलापूर प्रतिनिधी

Badlapur Laundry Prices Hike : खाण्यापिण्याच्या वस्तूंपासून सिलेंडरचे भाव आणि इतर सर्व वस्तूंच्या किंमती वाढत असचानाच आता इस्त्रीच्या कपड्यांनाही महागाईचा शॉक बसणार आहे. आता कडक इस्त्री करून कपडे घालण्यासाठीही जादा पैसे मोजावे लागणार आहेत. कारण कुळगांव बदलापूर लाँन्ड्री चालक-मालक वेल्फेअर असोसिएशननं प्रत्येक कपड्यामागे 1 रुपयांनी दर वाढवण्याचा निर्णय घेतलाय आहे. गुरीवारपासून ही दरवाढ लागू करण्यात आली आहे.

बदलापूर शहरात यापूर्वी एका शर्टसाठी किंवा पॅन्टसाठी 7 रुपये दर आकारला जात होता. मात्र आता भाववाढीनंतर ग्राहकांना एका शर्ट किंवा पॅन्टच्या इस्त्रीसाठी 8 रुपये मोजावे लागणार आहेत. विजेच्या दरात झालेली वाढ आणि जीवनावश्यक वस्तू महागल्यानं लॉंन्ड्रीचं काम करणाऱ्या कामगारांचे पगारही वाढले आहेत. त्यामुळे हा दरवाढीचा निर्णय घ्यावा लागल्याची माहिती बदलापुरातील शिरगांव परिसरातील लॉंन्ड्री चालक दिनेश कनौजिया यांनी दिलीय.

कपड्यांच्या इस्त्रीसह ड्रेसच्या धुलाईसाठी यापूर्वी 120 रुपये आकारले जात होते. ते आता 160 रुपयांपर्यंत वाढवण्यात आले आहेत. तसच ड्रायक्लिनिंग आणि इतर सुविधांच्या दरातही वाढ करण्यात आली असल्याचं लॉन्ड्री चालकांनी सांगितलय. कुळगांव बदलापूर लॉंन्ड्री चालक-मालक वेल्फेअर असोसिएशनने यापूर्वी एप्रिल 2022 मध्ये दर वाढवले होते. तेव्हाही 1 रुपयानं ही दरवाढ करण्यात आली होती.

गेल्या तीन वर्षांपासून कपड्यांच्या इस्त्रीचा दर हा प्रति शर्ट किंवा पॅन्ट 7 रुपये इतका होता. मात्र 3 वर्षानंतर वाढलेली महागाई आणि इतर सर्व बाबींचा विचार करून तसेच ग्राहकांचाही विचार करून फक्त एकच रुपया दरवाढ करण्यात आल्याचं लॉन्ड्री चालक सांगत आहेत. बदलापूर शहरात जवळपास 300 लॉन्ड्रीची दुकानं आहेत. या सर्वच दुकानांमध्ये इस्त्रीचे दर वाढणार आहेत. त्यामुळे कडक कपडे घालण्यासाठी ग्राहकांना आता जास्त पैसे मोजावे लागणार आहेत.