Ulhasnagar News : उल्हासनगर महापालिकेच्या सहाय्यक आयुक्तांवर जादूटोणा करण्याचा प्रयत्न, घटना सीसीटीव्हीत कैद

Kalyan News :

उल्हासनगर महापालिकेचे सहायक आयुक्त यांच्यावर जादूटोणा करण्यासाठी त्यांच्या कारच्या चाकाखाली लिंबू ठेवल्याचा धक्कादायक प्रकार उघड झाला आहे. ही घटना सीसीटीव्ही कॅमेऱ्यात कैद झाली आहे. याप्रकरणी पालिकेच्या चार्जिंग स्टेशनवरील कर्मचाऱ्यावर गुन्हा दाखल झाला आहे.

उल्हासनगर महानगरपालिकेत सहाय्यक आयुक्त सामान्य प्रशासन आणि सार्वजनिक आरोग्यपदी कार्यरत असलेले मनीष हिवरे यांच्यावर जादूटोणा करण्याचा प्रयत्न करण्यात आला आहे. (Latest Marathi News)

उल्हासनगर महापालिका मुख्यालयाच्या मागे असलेल्या महापालिकेच्या चार्जिंग स्टेशनसमोर त्यांची कार उभी होती. ११ ऑक्टोबरला सायंकाळी ७ वाजता हिवरे हे चार्जिंग स्टेशनजवळील सार्वजनिक आरोग्य विभागाच्या कार्यालयात बसले असता त्यांच्या कारच्या चाकाखाली लिंबू ठेवण्यात आल्याची माहिती कर्मचाऱ्याने दिली.

१२ तारखेला सीसीटीव्ही तपासले असता नागरी सुविधा केंद्रातील कर्मचाऱ्याने हे कृत्य केले असल्याचे दिसले. हिवरे यांनी हा प्रकार आयुक्त अजिज शेख यांना सांगितल्यावर शेख यांनी पोलीस ठाण्यात तक्रार करण्याच्या सूचना दिल्या. (Crime News)

त्यानंतर हिवरे यांनी मध्यवर्ती पोलीस ठाणे गाठून याबाबत तक्रार दिली. महापालिका कर्मचाऱ्यावर महाराष्ट्र नरबळी आणि इतर अमानुष, अनिष्ट, अघोरी प्रथा व जादूटोणा प्रतिबंध अधिनियमानुसार गुन्हा दाखल झाला आहे. याप्रकरणी मध्यवर्ती पोलीस ठाणे अधिक तपास करत आहे.