Pune News: धक्कादायक! नोकरीचे आमिष दाखवत महिलेवर अत्याचार, फोटो व्हायरल करण्याची धमकी, तिघांविरोधात गुन्हा दाखल

पुणे- नोकरीचे आमिष दाखवत २६ वर्षीय महिलेवर अत्याचार केल्याची धक्कादायक घटना पुण्यात घडली आहे. अत्याचार करत फोटो काढून व्हायरल करण्याची धमकी देत एक लाख रुपयांची खंडणी मागितल्याचेही माहिती तपासात समोर आली आहे.

या धक्कादायक प्रकरणात फिर्यादीच्या तक्रारीवरुन कोंढवा पोलिस ठाण्यात ३ जणांविरोधात भारतीय दंडात्मक कलम ३७६ (२), ५०६, ३८४, ३२३ अन्वये गुन्हा दाखल करण्यात आला आहे. (Pune News)

याबाबत अधिक माहिती अशी की, पुण्यात डंजो या ऑनलाईन डिलिव्हरी ॲप कंपनीमध्ये नोकरीचे आमिष दाखवत २६ वर्षीय महिलेवर अत्याचार करत फोटो व्हायरल करण्याची धमकी देवून एक लाख रुपयांच्या खंडणीची मागणी केल्याची घटना उघडकीस आली आहे. पुण्यातील कोंडवा परिसरात ही घटना घडली आहे. या प्रकरणात आरिफ खान, रवी आणि रियाज अशा ३ जणांविरोधात पोलिसांनी बलात्कार,खंडणी यासारखे गुन्हा दाखल केला आहे.

आरिफ खान याने पीडित महिलेला तो तिच्या पतीचा मित्र आहे असं सांगून डंजो या ऑनलाईन डिलिव्हरी ॲपमध्ये नोकरी लावून देतो असे सांगितले. डिलिव्हरी गर्ल म्हणून काम लावून देतो असे सांगत आरिफने पीडित महिलेला एक डिलिव्हरी करायची आहे असे सांगत बोलावून घेतले. त्यानंतर त्याने त्या महिलेला एका लॉजवर नेऊन तिच्या इच्छेविरुद्ध शरीर संबंध ठेवले. या सगळ्या बाबत कोणाला काही सांगितले तर फोटो व्हायरल करील अशी धमकीही दिली.

या प्रकरणातील दुसरा आरोपी रवीने त्या महिलेला १ लाख रुपयाची खंडणी ही मागितली. तसेच यातील तिसऱ्या आरोपीनेही महिलेला वारंवार धमकावले. या सगळ्या त्रासाला कंटाळून पीडित महिलेने पोलिस ठाण्यात धाव घेतली आणि तक्रार दाखल केली, हा सगळा प्रकार जुलै २०२२ ते ऑगस्ट २०२२ दरम्यान घडलाची माहिती समोर आली आहे. (Latest Marathi News)