Hindutva Politics: "शिवसेनेच्या उभारणीत 'शेंडी जानव्याचं' योगदान काय ते ठाकरेंना विचारावं" - आनंद दवे

ज्ञानेश्वर हिंगोलीकर, पुणे

पुणे: शिवसेनेचे खासदार विनायक राऊत यांनी हिदुत्वाबाबत केलेल्या वक्तव्यामुळे राजकारण चांगलचं तापलं आहे. "शिवसेनेचं हिंदुत्व हे व्यापक आहे; शेंडी-जानव्याचे नाही. शिवसेनेच्या हिंदुस्थानात मुसलमानामसह अन्य धर्मीयही येतात" असं वक्तव्य शिवसेनेचे खासदार विनायक राऊत (Vinayak Raut) यांनी शिवसंपर्क मेळाव्याच्या निमित्ताने आयोजित केलेल्या औरंगाबादमधील पत्रकार परिषदेत त्यांनी हे वक्तव्य केलं होतं. त्याचे आज पडसाद पडायला सुरुवात झालीय. याबाबत आता पुण्यात (Pune) ब्राम्हण महासंघाचे अध्यक्ष आनंद दवे (Anand Dave) यांनी राऊतांना इशारा दिला आहे. (Anand Dave President Of bramhan Mahasangh Has Slamed To MP Vinayak Raut For His Statement On Brahman Hindutva)

हे देखील पहा -

आनंद दवे यांनी खासदार विनायक राऊतांना धारेवर धरलं आहे, ते म्हणाले की, शेंडी, जानवं आणि शिवसेना यांचं जरी नातं त्यांना माहित असतं तर ते असे बोलले नसते. शिवसेनेच्या उभारणीत शेंडी जानव्याचं काय योगदान आहे ते ठाकरेंना विचारावं. याच काश्मिरी शेंडी, जानव्यासाठी वंदनीय बाळासाहेब यांनी काय काय केले होते त्याचा तरी त्यांनी अभ्यास करावा असा खोचक टोला त्यांनी राऊतांना लगावला आहे, तसेच ब्राम्हण समाजाने विनायक राऊतांना महत्व देऊ नये असं आवाहन त्यांनी ब्राम्हण समाजाला केलं आहे.

त्याचप्रमाणे औरंगाबादमध्येही (Aurangabad) याचे पडसाद उमटले आहेत. ब्राह्मण समन्वय समितीच्या वतीने खासदार विनायक राऊत यांच्या वक्तव्याचा निषेध करण्यात आलाय. तसेच खासदार विनायक राऊत यांनी ब्राम्हण समाजाची माफी मागावी अन्यथा शिवसेनेवर बहिष्कार घालणार, असा इशारा ब्राह्मण समन्वय समितीचे कार्याध्यक्ष सुरेश देशपांडे यांनी दिला आहे.

Edited By - Akshay Baisane