Maharashtra politics : अजित पवारांचा शिंदेंना धक्का, नवी मुंबईतील अनेकांच्या हातात घड्याळ

स्थानिक स्वराज्य संस्थांच्या निवडणुकीच्या तोंडावर एकनाथ शिंदेंच्या शिवसेनेला जोरदार धक्का बसला आहे. पनवेलमधील बेलापूर येथील अनेक कार्यकर्त्यांनी शिवसेनेला जय महाराष्ट्र केला आहे. मंगळवारी रात्री बेलापूरमधील अनेक कार्यकर्ते अन् पदाधिकाऱ्यांनी अजित पवार यांच्या राष्ट्रवादी कांग्रेसमध्ये पक्ष प्रवेश केला आहे. महिला आणि बाल विकास मंत्री आदिती तटकरे यांच्या उपस्थितीत मंगळवारी पक्ष प्रवेश कार्यक्रम पार पडला. आगामी निवडणुकीच्या आधी पनवेलमध्ये हा एकनाथ शिंदेंना जोरदार धक्का मानला जातोय. पक्ष प्रवेश सोहळ्याला राष्ट्रवादी काँग्रेस पक्षाचे प्रदेश सरचिटणीस व मुख्य प्रवक्ते आनंद परांजपे,राष्ट्रवादी काँग्रेस पार्टी ठाणे जिल्हाध्यक्ष नजीब मुल्ला,महिला जिल्हाध्यक्षा वनिताताई गोतपागर, सुहास देसाई यांच्यासह इतर पदाधिकारी व कार्यकर्ते मोठ्या संख्येने उपस्थित होते.

पनवेलमध्ये एकनाथ शिंदे गटाला अजित पवार गटाने धक्का दिला आहे. नवी मुंबई महानगरपालिकेच्या निवडणुकीच्या निमित्ताने अजित पवार यांच्या राष्ट्रवादी काँग्रेसकडून एखनाथ शिंदे यांच्या शिवसेनेला जबरदस्त धक्का दिला आहे. बेलापूर मतदारसंघातून शिंदे गटाच्या अनेक कार्यकर्ते आणि पदाधिकाऱ्यांनी अजित पवार गटामध्ये पक्षप्रवेश केला आहे. राज्याच्या महिला बालकल्याण मंत्री आदिती तटकरे यांच्या नेतृत्वाखाली पक्षप्रवेशाचे कार्यक्रम ठाण्यात पार पडला. ४० पेक्षा जास्त पदाधिकारी अन् कार्यकर्त्यांनी राष्ट्रवादीचे घड्याळ हातात बांधले आहे, या पक्ष प्रवेशामुळे नवी मुंबई शहरामध्ये राष्ट्रवादी काँग्रेसची ताकद वाढली आहे.

काँग्रेसलाही जबरी धक्का -

मंगळवारी ठाणे शहरातील एन.के.टी.सभागृह,खारकर आळी येथे राष्ट्रवादी काँग्रेस पार्टी आयोजित पक्ष प्रवेश सोहळा पार पडला. काँग्रेस आणि शिंदेंच्या कार्यकर्ते अन् पदाधिकाऱ्यांनी राष्ट्रवादीत प्रवेश केल. काँग्रेस पक्षातील असंख्य पदाधिकारी व कार्यकर्त्यांनी उपमुख्यमंत्री अजितदादा पवार यांच्या नेतृत्वावर विश्वास ठेवून राष्ट्रवादी काँग्रेस पक्षामध्ये जाहीर प्रवेश केल्याची प्रतिक्रिया आदिती तटकरेंनी दिली आहे. ठाण्यात राष्ट्रवादी काँग्रेस पक्षाची ताकद निश्चितच वाढेल,यात शंका नाही, असेही त्या म्हणाल्या.