Ajit Pawar On Rumours: वेगवान राजकीय घडामोडींदरम्यान अजित पवारांची पहिली प्रतिक्रिया, म्हणाले...

Ajit Pawar News: राज्यात मोठा राजकीय भूकंप होण्याची शक्यता वर्तवली जात आहे. अजित पवार भाजपसोबत जात असल्याच्या चर्चा सुरु असताना आता स्वत: त्यांनीच याबद्दल स्पष्टीकरण दिलं आहे. कारण नसताना माझ्या आणि माझ्या सहकाऱ्यांबद्दल गैरसमज पसरवले जात आहेत. अशा बातम्यांमध्ये काहीही तथ्य नाही, असं अजित पवारांनी म्हटलं.

40 आमदारांच्या सह्या कुणीही घेतल्या नाही. सही घेण्याचं काहीही कारण नाही. या बातम्यांना काहीही आधार नाही. कुणी काय मत व्यक्त करावं हा त्यांचा अधिकार आहे. अनेक आमदार कामानिमित्त येत असतात. आजही नेहमीप्रमाणे आमदार भेटायला आले होते. आमदारांची वेगवेगळी कामं होती, असं अजित पवार यांनी स्पष्ट केले. (Political News)

आम्ही सगळे राष्ट्रवादी काँग्रेसमध्येच आहोत. मात्र अशा बातम्यांमुळे आमच्या कार्यकर्त्यांमध्ये संभ्रम तयार होतो. अशा बातम्या जाणीवपूर्वक पसरवल्या जात आहेत. राज्यातील महत्वाच्या प्रश्नावरुन लक्ष हटवण्यासाठी अशा अफवा पसरवल्या जात आहेत, असा आरोप अजित पवार यांनी केला आहे.  (Latest Marathi News)

माध्यमांचे प्रतिनिधी माझ्या घराबाहेर कॅमेरे लावतात. तुम्ही अंदाज व्यक्त करताय. या गोष्टी थांबवल्या पाहिजे. माध्यमांनी सभ्यता पाळली पाहिजे. मी राष्ट्रवादीतच राहणार हे काय आता प्रतिज्ञापत्रावर लिहून देऊ का, असा संतापही अजित पवारांनी व्यक्त केला.