Maharashtra Politics: आदित्य ठाकरेंना घेरण्यासाठी महायुतीने डाव टाकला! वरळी विधानसभेसाठी भाजपचा चेहरा ठरला?

वैदेही कानेकर, मुंबई

Maharashtra Assembly Election 2024: विधानसभा निवडणुकांची घोषणा झाल्यानंतर राजकीय घडामोडींना वेग आला आहे. निवडणुकीच्या मोर्चेबांधणीसाठी भारतीय जनता पक्षाने जोरदार तयारी केली असून अनेक दिग्गज नेते विधानसभेच्या रिंगणात उतरणार आहेत. अशातच आता वरळी विधानसभा मतदार संघात महायुतीच्या उमेदवार म्हणून भाजप नेत्या शायना एन सी यांच्या नावाची चाचपणी करण्यात येत आहे. त्यामुळे आदित्य ठाकरेंना घेरण्यासाठी भाजपने मोठी रणनिती आखली आहे.

महाराष्ट्राच्या विधानसभा निवडणुकीत वरळी विधानसभा मतदार संघाकडे सर्वांचे विशेष लक्ष लागले आहे. ठाकरे गटाचे नेते आणि विद्यमान आमदार आदित्य ठाकरे यांच्या विरोधात महायुती कूणाला उमेदवारी देणार याकडे सर्वाचे लक्ष लागले आहे. अशातच हायप्रोफाईल वरळी विधानसभा मतदारसंघातून महायुतीच्या उमेदवार म्हणून भाजप नेत्या शायना एन सी यांच्या नावाची चाचपणी करण्यात येत असल्याची चर्चा सुरु आहे.

वरळी विधान सभा मतदारसंघाचे विद्यमान आमदार आणि ठाकरे गटाचे नेते आदित्य ठाकरे यांच्या विरुद्ध भाजपा नेत्या शायना एन सी असा हायप्रोफाईल सामना होणार असल्याची शक्यता आहे. शायना एन सी या भाजपच्या नेत्या आहेत. तसेच व्यावसायाने त्या फॅशन डिझाईनर देखील आहेत. शायना एन सी यांचे वडिल नाना चूडासामा हे मुंबई शहराचे माजी शेरीफ होते. वरळी विधान सभा मतदारसंघ हा हायप्रोफाईल मतदारसंघ आहे.

वरळी विधानसभा मतदारसंघात बीडीडी चाळी, डिलाईल रोड बीआयटी चाळी, जीजामाता नगर झोपडपट्टी, वरळी कोळीवाडा तसेच वरळी सी फेस विभागातील अनेक हायराईज टॅावर ही उच्चभ्रू नागरिकांचे निवासस्थान देखील आहेत. दरम्यान, त्यामुळे आदित्य ठाकरे यांच्या विरोधात शायना एन सी यांची उमेदवार म्हणून चाचपणी करताना महायुतीच्या नेत्यांनी सर्वकष विचार करून त्यांची निवड करत असल्याची माहिती वरिष्ठ सूत्रांनी दिली आहे.