Navi Mumbai: नवी मुंबईत अप्पर जिल्हाधिकाऱ्यांना अटक, लाच घेताना रंगेहाथ पकडलं

Summary:

• नवी मुंबईत अप्पर जिल्हाधिकाऱ्यांना लाच घेताना अटक

• सिडको अधिकाऱ्यावर एसीबीची मोठी कारवाई

• रामदास जगताप लाचखोरी प्रकरणात अटकेत

• नवी मुंबई एसीबी सापळा कारवाई

विकास मिरगणे, नवी मुंबई

नवी मुंबईमध्ये अप्पर जिल्हाधिकाऱ्यांना अटक करण्यात आल्याची मोठी बातमी समोर आली आहे. अप्पर जिल्हाधिकारी रामदास जगताप यांना २२ हजार रुपयांची लाच घेताना रंगेहाथ पकडण्यात आले. नवी मुंबई लाच लुचपत प्रतिबंधक विभागाच्या पथकाने सापळा रचत ही कारवाई केली. रामदास जगताप हे सिडकोचे भूमी व भूमापन मुख्य अधिकारी देखील आहेत. या कारवाईमुळे नवी मुंबईत खळबळ उडाली आहे.

मिळालेल्या माहितीनुसार, एसीबीने सापळा रचत सिडकोच्या मुख्य भूमी अधिकाऱ्यांना अटक केली. पोलिस उपअधीक्षक धर्मराज सोनके यांच्या पथकाने यशस्वी सापळा रचत ही कारवाई केली. सिडकोच्या २२.५ टक्के योजनेतील रजिस्ट्रेशन प्रकरणात २२,५०० रुपयांची लाच घेताना ही मोठी कारवाई करण्यात आली आहे. नवी मुंबई आंतरराष्ट्रीय विमानतळ सिडकोचे मुख्य भूमी व भूमापन अधिकारी रामदास हरिभाऊ जगताप (५७ वर्षे) यांना अटक करण्यात आली आहे.

रामदास जगताप यांच्या सूचनेनुसार शिपाई हरेश सोनवणेने रक्कम स्वीकारत असताना ही कारवाई करण्यात आली आहे. रामदास जगताप आणि हरेश सोनवणे या दोघांन एसीबीने अटक केली असून त्यांची चौकशी केली जात आहे. या प्रकरणाची पुढील कारवाई नवी मुंबई एसीबी युनिट करत आहे. या कारवाईमुळे नवी मुंबईच्या सिडकोमध्ये चर्चेला उधाण आले आहे.