प्रसिद्ध 'तळवळकर्स जिम' विरोधात २०६ कोटींचे कर्ज बुडवल्याप्रकरणी गुन्हा दाखल...

मुंबई: व्यायामशाळा क्षेत्रातील प्रसिद्ध तळवळकर्स बेटर व्हॅल्यू फिटनेस लिमिटेडशी संबंधीत आठ व्यक्तींविरोधात मुंबई पोलिसांच्या आर्थिक गुन्हे शाखेने २०६ कोटी रुपयांच्या बुडीत कर्जाप्रकरणी गुरूवारी मुंबईतील गावदेवी पोलीस ठाण्यात गुन्हा दाखल केला आहे. कर्ज घेऊन बुडवल्याप्रकरणी राष्ट्रीयकृत बँकेकडून करण्यात आलेल्या तक्रारीनंतर हा गुन्हा दाखल करण्यात आला आहे. (A case has been filed against the famous 'Talwalkars Gym' for defaulting on a loan of Rs 206 crore)

हे देखील पहा -

तळवळकर्स बेटर व्हॅल्यू फिटनेस लिमिटेडचे गिरीश मधुकर तळवळकर, प्रशांत सुधाकर तळवळकर, विनायक गवांदे, अनंत गवांदे, हर्ष भटकर, मधुकर विष्णू तळवणकर, दिनेश राव व गिरीश नायक यांच्याविरोधात हा गुन्हा दाखल करण्यात आला आहे. २०१६ ते २०१९ या कालावधीत बँकेची २०६ कोटी ३५ लाखांची फसवणूक करण्यात आल्याची तक्रार एक्सीस बॅकेकडून करण्यात आली आहे. गुन्हा दाखल करण्यापूर्वी आर्थिक गुन्हे शाखेने सहा महिने प्राथमिक चौकशी केली. त्यात याप्रकरणी गुन्हा दाखल होत असल्याचे निष्पन्न झाल्यानंतर १४ ऑक्टोबरला याप्रकरणी गुन्हा दाखल केला आहे.

२०१९ मध्ये कर्जाची मुद्दल व व्याजाची रक्कम भरली गेली नाही. १९३२ मध्ये या व्यायामशाळेची स्थापना करण्यात आली होती. त्यानंतर नावारुपाला आलेल्या या व्यायामशाळा ग्रुपचे ८० शहरांमध्ये १५२ हेल्थक्लब सुरू करण्यात आले होते. त्याचे दोन लाखांहून अधिक सदस्य होते.

Edited By - Akshay Baisane