Shocking News : प्रेमाचा दुर्दैवी अंत! घरात कोणीही नसल्याचं पाहिलं, रागारागात आलेल्या बॉयफ्रेंडने गर्लफ्रेंडला पेटवलं, नेमकं काय घडलं?

ठाण्यातून धक्कदायक बातमी समोर आली आहे. एका १७ वर्षीय अल्पवयीन मुलाने रागारागात आपल्या प्रेयसीला पेटवून दिले आहे. हा आगीचा भडका इतका भयंकर होता की अल्पवयीन मुलगी ८० टक्के भाजली आहे. सदर पीडितेला मुंबईतील केईम रुग्णालयात दाखल करण्यात आले आहे. या घटनेने ठाणे हादरलं आहे. पोलिसांनी याप्रकरणी अल्पवयीन मुलाविरोधात गुन्हा दाखल केला आहे.

मिळालेल्या माहितीनुसार, पीडित मुलगी आणि तिच्या प्रियकरामध्ये वारंवार वादविवाद सुरु होते. काही दिवसांपूर्वी चेंबूर परिसरातही त्यांच्यात भांडण झाले होते, ज्यामध्ये मुलाने मुलीला धमकी दिली होती की तो तिला जिवंत सोडणार नाही. अनेक जुन्या वादातून आरोपी मुलाने मुलीच्या घरी कोणीही नसल्याची संधी साधून तिच्या घरात घुसला. तिच्यावर ज्वलनशील पदार्थ टाकत तिला पेटवलं.

आरोपी मुलगा तिथून पळून न जात तिथेच थांबून जळत्या आगीत होरपळणाऱ्या पीडितेची मजा घेत होता. थोड्या वेळाने घरातून धूर बाहेर जाऊ लागल्याने शेजाऱ्यांना संशय आला असता त्यांनी तातडीने पोलिसांना कळवले. पोलिसांनी घटनास्थळी धाव घेत आरोपी मुलाच्या मुसक्या आवळल्या. तसेच पीडितेला तातडीने जवळच्या रुग्णालयात दाखल केले. मात्र डॉक्टरांनी तरुणीची प्रकृती गंभीर असल्याने मुंबईतील नामांकित केईम हॉस्पिटल येथे रेफर केले.

डॉक्टरांनी दिलेल्या माहितीनुसार, तरुणी ८० टक्के भाजली असून तिची प्रकृती गंभीर असल्याचं म्हटलं आहे. शिवाय तिच्या अंतर्गत अवयवांना जास्त प्रमाणावर इजा झाली आहे. दरम्यान पोलिसांनी आरोपी मुलाविरोधात भारतीय दंड संहिता (आयपीसी) च्या कलम १०९ आणि ३५१(२) अंतर्गत गुन्हा दाखल करण्यात आला आहे. अधिकाऱ्याने सांगितले की हा हल्ला पूर्वीच्या भांडणातून आणि रागातून झाला होता. मुलीची प्रकृती चिंताजनक असल्याने अद्याप तिचा जबाब नोंदवण्यात आलेला नाही. सध्या पोलिस या प्रकरणाचा सखोल तपास करत आहेत आणि आरोपीची चौकशी सुरू आहे.