Shocking : जेवून हात धुवायला गेला, अन् झाकण नसलेल्या नाल्यात पडला, डोंबिवलीत १४ वर्षीय मुलाचा मृत्यू

राज्यभर नवरात्रीचा उत्सव आनंदात सुरु आहे. अशातच ​झाकण नसलेल्या केडीएमसीच्या नाल्यात पडून १४ वर्षीय मुलाचा मृत्यू झाल्याची धक्कदायक घटना घडली आहे. नवरात्र निमित्त जगदंबा मंदिरात भंडाऱ्याचा कार्यक्रमा दरम्यान जेवल्यानंतर हात धुण्यासाठी हा मुलगा गेला असता बाजूला झाकण नसलेल्या नाल्यात पडून या मुलाचा मृत्यू झाला आहे. मृत मुलाचे नाव आयुष असल्याचे समोर आले आहे.

मिळालेल्या माहितीनुसार, शारदीय नवरात्रौउत्सवानिमित्त डोंबिवलीत गोपी चौक परिसरात असलेल्या जगदंबा मंदिरात भंडाऱ्याचा कार्यक्रम आयोजित केला होता. या कार्यक्रमाला शेकडो भाविकांनी हजेरी लावली. प्रसादाचा लाभ घेण्यासाठी जगदंबा मंदिरात मोठ्या संख्येने भाविक उपस्थित होते. या दरम्यान आयुष नावाचा १४ वर्षीय मुलगा भंडाऱ्याचा महाप्रसाद जेवून हात धुण्यासाठी बाजूला असलेल्या नाल्याजवळ गेला.

या नाल्याला झाकण नसल्याने आयुषचा तोल जाऊन त्यामध्ये पडला. या दुर्घटनेत आयुषचा मृत्यू झाला आहे. नाल्याला झाकण नसल्याने या आयोजकांनी या नाल्याच्या बाजूला बॅरिगेटिंग केले होते मात्र काल ते बॅरिगेटिंग लावले नव्हते. या नाल्याचे गेल्या अनेक दिवसांपासून झाकण तुटलेल्या अवस्थेत होते आणि याच दरम्यान हा मुलगा या नाल्यात पडला.

विशेष म्हणजे घटनेची माहिती मिळताच अग्निशामक दलाची टीम या ठिकाणी पोहोचली. मात्र बचाव कार्यासाठी त्यांच्याकडे फक्त बॅटरी होती आणि त्याच्याच माध्यमातून त्या मुलाचा शोध घेत होते असा आरोप स्थानिकांनी लावलेला आहे. त्यामुळे नेमकी चूक कोणाची असा सवाल आता नागरिकांमधून उपस्थित केला जात आहे. तर दुसरीकडे घटना घडल्यानंतर केडएमसी कडून मात्र घाई घाईत या नाल्यावर झाकण बसवण्यात आले आहे .