रविकांत तुपकरांचे आंदोलन चिघळले; एकाने केला आत्मदहनाचा प्रयत्न!

बुलढाणा : सोयाबीन व कापूस मालाला योग्य भाव मिळावा यासाठी नागपूर येथील संविधान चौकात स्वाभिमानी शेतकरी नेते रविकांत तुपकर यांनी बेमुदत अन्न त्याग आंदोलन सुरू केले होते. दुसऱ्याच दिवशी नागपूर पोलिसांनी तुपकर यांना ताब्यात घेऊन तेथील आंदोलन मोडीत काढण्याचा प्रयत्न केला.

हे देखील पहा :

तुपकरांना नागपूर पोलिसांनी बुलढाणा येथील त्यांच्या निवासस्थानी आणून सोडले. मात्र, तुपकरांनी त्यांच्या निवास स्थानी अन्नत्याग आंदोलन सुरूच ठेवले आहे. आज चार दिवस झाले अजून पर्यंत राज्य सरकारने आंदोलनाची दखल घेतली नाही. त्यामुळे विदर्भातील शेतकरी बांधव रस्त्यावर उतरले, आज असंख्य ठिकाणी रास्तारोको आंदोलन करण्यात आले.

आता चक्क स्वाभिमानच्या अल्पसंख्याक विभागाचे जिल्हाध्यक्ष रफिक शेख यांनी अंगावर रॉकेल ओतून आत्मदहन करण्याचा प्रयत्न केला. वेळीच पोलिसांनी रफिक शेख यांना ताब्यात घेतले त्यामुळे मोठा अनर्थ टळला. यावेळी पोलीस व कार्यकर्त्यांमध्ये मोठ्या प्रमाणात बाचाबाची झाली.

Edited By : Krushnarav Sathe