Yavatmal : हातपाय बांधून कारमध्ये कोंबलं, मुलं पळवणारी टोळी समजून गावकऱ्यांनी तरुणांना तुडवलं; दोघे गंभीर जखमी

संजय राठोड, यवतमाळ

यवतमाळमध्ये मुल पळवणारी टोळी समजून काही तरुणांना बेदम मारहाण करण्यात आल्याची घटना समोर आली आहे. या घटनेत सहा पैकी दोघांची प्रकृती गंभीर आहे, तर चार जण किरकोळ जखमी झाले आहेत. घाटंजी पोलिसांनी घटनास्थळी धाव घेतल्याने पुढील अनर्थ टळला आहे. याप्रकरणी पुढील चौकशी पोलीस करत आहे.

मिळालेल्या माहितीनुसार, यवतमाळच्या दारव्हा तालुक्यातील बोरी अरब येथील पाच जण उधारीचे पैसे वसूल करण्यासाठी मुकुटबन येथे गेले. मात्र ज्यांच्याकडून पैसे घ्यायचे होते, ते नसल्याने तरुणांनी त्याच्या जवळच्या नातेवाईकाला हातपाय बांधून गाडीत कोंबलं आणि घेऊन निघाले.

यादरम्यान कामटवाडा जवळ नागरिकांना संशय आल्याने त्यांनी कार थांबवायला सांगितली. कार थांबवली असता त्यात संशयास्पद एक व्यक्ती कोंबलेल्या अवस्थेत आढळून आल्याने मुलं पळविणारी टोळी समजून नागरिकांनी कारचा पाठलाग सुरू केला.

घाटंजी पोलीस ठाण्याच्या हद्दीतील पांढुर्णा इथे वाहन थांबवलं, त्यातून सर्वच जण पळाले एक जण सापडला. त्याला नागरिकांनी चांगलाच चोप दिला. या घटनेत सहा पैकी दोघांची प्रकृती गंभीर असल्याने त्यांना यवतमाळ येथील वसंतराव नाईक शासकीय वैद्यकीय महाविद्यालयात उपचारासाठी दाखल करण्यात आले आहे. तसेच याप्रकरणी पोलीस अधिक तपास करत आहेत.