Yavatmal : बँकेतून काढलेले १ लाख रुपये लांबविले; चोरटे पोलिसांच्या ताब्यात

संजय राठोड 
यवतमाळ : महिला बचत गट सचिवाने बँकेत धनादेश वटविल्यानंतर एक लाख रुपयांची रक्कम घेऊन बाहेर पडल्या. मात्र चोरटयांनी संधी साधत पिशवीत ठेवलेली एक लाख रुपयांची रक्कम लांबविली होती. या प्रकरणी पोलिसांकडून तपास करत रक्कम लांबविणार्या चार चोरट्यांना पोलिसांनी एका लॉजवरून ताब्यात घेतले आहे. 

यवतमाळच्या पांढुर्णा बुद्रुक येथील वैष्णवी महिला बचत गटाच्या सचिव साधना ठावरी आणि अध्यक्ष सुनिता परसनकार या बचत गटाच्या कामासाठी बँकेत गेल्या होत्या. त्यांनी स्टेट बँक ऑफ इंडियाच्या घाटजी शाखेतून दोन लाख रुपये धनादेशद्वारे काढले. रक्कम एका पिशवीत ठेवून या दोघी ग्राहक सेवा केंद्रावर गेल्या. दरम्यान यावर चोरट्याची नजर होती. यानंतर त्यांनी संधी साधत रक्कम लांबविली. 

चोरटे सीसीटीव्ही कॅमेरात कैद 

ग्राहक सेवा केंद्रात असलेल्या गर्दीचा फायदा घेत चोरांनी पिशवीत ठेवलेली एक लाख रुपये लंपास केले. काही वेळानंतर साधना ठावरी यांच्या रक्कम चोरीला गेल्याचे लक्षात आले. यानंतर त्यांनी लागलीच पोलिसात जात घडल्या प्रकारची तक्रार दाखल केली. घटनेची माहिती मिळतात ठाणेदार केशव ठाकरे यांनी सीसीटीव्ही फुटेज तपासले यात आरोपींची हालचाल स्पष्टपणे दिसून आली

लॉजवरून चौघांना घेतले ताब्यात 

सीसीटीव्हीत पहिले असता चोरटे पायीच बसस्थानकावर गेले. तिथून पारवा आणि नंतर पांढरकवण्यात लाॅजवर थांबल्याची माहिती पोलिसांना मिळाली. यानंतर पोलिसांनी लॉजवर जात या प्रकरणात विकी काळे, आश्विन काळे, भगीरथ काळे (सर्व राहणार कोळंबी, ता. कर्जत जिल्हा अहमदनगर) आणि मारुती धोत्रे तालुका रिसोड जिल्हा वाशिम यांना अटक करण्यात आली. या परकरणी चोकशी सुरु आहे.