मळणीयंत्रात केस अडकून उपटल्याने महिला गंभीर; जिंतूर तालुक्यातील दुर्घटना

परभणी : मळणीयंत्रावर काम करत असलेल्या महिलेच्या डोक्यावरचे केस यंत्रात अडकून ते उपटले गेल्याने सदरील साठ वर्षीय महिला गंभीर जखमी झाल्याची घटना रविवारी सकाळी जिंतूर (Jintur) तालुक्यातील सांगळेवाडी (Sangalewadi) येथे घडली. सध्या ग्रामीण भागातील शेतीमध्ये गहू, ज्वारी, हरभरा व इतर रब्बी पिकांच्या काढणीची व खळ्यांची लगबग सुरु आहे.

हे देखील पाहा :

कामासाठी मजुरांचा वानवा असून मजुरीचेही दर वाढलेले असल्यामुळे सर्वसामान्य शेतकऱ्यांच्या कुटूंबातील घरातील महिलांसह सर्वजण कामाला लागले आहेत. महिलांना तर घरातील कामे आटोपून शेतातील कामांना हातभार लावावा लागत आहे. त्यानुसार सांगळेवाडी येथील निलावंती सखाराम सांगळे (वय ६० वर्षे) ह्या घरच्या शेतातील मळणीयंत्रावर गहू काढत असताना अचानक त्यांच्या डोक्यावरील केस मळणीयंत्रात अडकून ते उपटले गेल्यामुळे त्या गंभीर जखमी झाल्या.

नातेवाईकांनी तत्काळ जिंतूर येथील ग्रामीण रुग्णालयात उपचारासाठी दाखल केले. परंतु, डोक्यावरील संपूर्ण केस उपटल्यामुळे रक्तस्त्राव होऊ लागला. तेव्हा रुग्णालयातील प्रथमोपचारानंतर पुढील उपचारासाठी त्यांना परभणी येथे जिल्हा रुग्णालयात पाठवण्यात आले.

Edited By : Krushnarav Sathe