Washim News : महंत जितेंद्र महाराजांचा राज्यस्तरीय शासकीय समितीच्या सदस्य पदाचा राजीनामा; नियुक्तीला झाले तिनच दिवस

मनोज जयस्वाल 
वाशीम : वाशीमच्या पोहरादेवी येथील भक्तीधाम धर्मपिठाचे महंत जितेंद्र महाराज यांची शासनाने संत सेवालाल महाराज बंजारा तांडा समृध्दी योजने अंतर्गत राज्यस्तरीय समितीच्या अशासकीय सदस्य पदी तीन वर्षासाठी नियुक्ती केली होती. मात्र जितेंद्र महाराजांनी नियुक्तीनंतर अवघ्या तीनच दिवसात पदाचा राजीनामा दिला आहे.

जितेंद्र महाराज हे भाजपचे सक्रिय कार्यकर्ते असून त्यांनी (BJP) भाजपकडे विधान परिषद किंवा कारंजा विधानसभा मतदारसंघातून उमेदवारी देण्याची मागणी केली होती. आताही कारंजा विधानसभा मतदारसंघावर आपला दावा कायम असून तिथून त्यांना उमेदवारी द्यावी. दुसऱ्याला उमेदवारी द्यायची झाल्यास बंजारा समाजातील कार्यकर्त्यालाच संधी द्यावी; अशीही मागणी महंत जितेंद्र महाराज यांनी भाजपकडे केली आहे.

धार्मिक अधिष्ठानाच्या कामाचे कारण 
जितेंद्र महाराज यांनी या आधी राज्यपाल नियुक्त आमदारामध्ये आपली नियुक्ती करावी; अशी मागणी भाजपकडे केली होती. मात्र त्या जागेवर दुसऱ्याला संधी मिळाल्याने महाराजांनी भाजपवर नाराजी दर्शवत राजीनामा दिल्याची चर्चा होती. यासंदर्भात जितेंद्र महाराज यांनी आता स्वतः स्पष्टीकरण दिले असून आपण नाराज नाही. मात्र, धार्मिक अधिष्ठानाच्या कामामुळे आपल्याला समितीच्या कामासाठी वेळ मिळणार नाही त्यामुळं राजीनामा दिला असल्याचं त्यांनी स्पष्ट केले.