Washim Crime News : अल्पवयीन मुलीचं अपहरण करून अत्याचार, तीन नराधमांना पोलिसांनी ठोकल्या बेड्या

बदलापूरच्या घटनेनंतर राज्यात अल्पवयीन मुली आणि महिलांवरील अत्याचाराच्या घटना समोर येत आहेत. त्यातच वाशिम जिल्ह्यातील रिसोड शहरात एका १३ वर्षांच्या मुलीचं अपहरण करून अत्याचार करण्यात आला आहे. याप्रकरणी तिघांना पोलिसांनी बेड्या ठोकल्या असून न्यायालयात हजर करण्यात आले. न्यायालयाने तीनही नराधमांची कारागृहात रवानगी केली आहे.

पोलिसांनी दिलेल्या माहितीनुसार, वाशिम जिल्ह्यातील रिसोड शहरात एका 13 वर्षीय अल्पवयीन मुलीचे अपहरण करून बलात्कार केल्याची घटना मंगळवारी 20 ऑगस्ट रोजी रात्री घडली होती. याप्रकरणी 21 ऑगस्ट रोजी मुलीच्या आईने पोलिसात फिर्याद दिली होती. त्यानंतर तिघांवर रिसोड पोलिसात गुन्हा दाखल करण्यात आला होता. 23 ऑगस्ट रोजी वैद्यकीय अहवालातात लैंगिक अत्याचार झाल्याची बाब समोर आल्यानंतर आरोपींवर बलात्काराचा गुन्हा दाखल करण्यात आला होता. त्यानंतर तीनही नराधमांना पोलिसांनी ताब्यात घेतलं आणि न्यायालयात हजर केलं. न्यायालयाने तीनही आरोपींची न्यायालयीन कोठडीत रवानगी केली आहे.

मुंगसाजी नगर येथील आरोपी पंढरी फुफाटेने तिला उचलून जवळच असलेल्या टेकडीवरच्या झोपडीत नेले. त्यांच्या मागोमाग गणेश फुफाटे आणि सूर्यभान फुफाटे हे सुद्धा तिथे पोहचले. यावेळी आरोपी पंढरी फुफाटे याने पीडित मुलीवर अमानुषपणे अत्याचार केला. आणि कुठेही वाच्यता न करण्याची धमकी दिली.