Bharat Nagpal Killing Case: भारत नागपाल हत्याकांड प्रकरण; दोषींना फाशीची शिक्षा द्या! नागपाल यांच्या न्यायासाठी हजारो नागरिकांचा कॅण्डल मार्च

चेतन व्यास, साम प्रतिनिधी

वर्धा जिल्ह्याच्या पुलगांव येथील उद्योजक भारत नागपाल याची चंद्रपूर जिल्ह्याच्या बांबर्डा येथे निर्घृण हत्या करण्यात आली होती.या घटनेनंतर संपूर्ण जिल्ह्यात खळबळ माजली आहे. आपल्या वडिलांना न्याय मिळावा याकरिता दोन वर्षाचा चिमुकला प्रशासनाला कठोर कारवाईची मागणी करत आहे. दुसरीकडे आज पुलगावं शहरात हजारो महिलांसाह नागरिकांनी रस्त्यावर हातात मेणबत्या घेत या घटनेचा निषेध नोंदविला आहे.

पुलगांव नगरपालिकेसमोर या कॅण्डल मार्चला सुरवात झाली. शहराच्या मुख्य मार्गाने होत पुन्हा नगरपालिकेसमोर या कॅण्डल मार्चचे समारोप झाले या कॅण्डल मार्च मध्ये पुलगांव शहरातील सर्वपक्षीय नागरिकांची उपस्थिती होती. यासंह आमदार राजेश बकाने, भाजपा जिल्हाध्यक्ष संजय गाते,नगराध्यक्ष कविता ब्राम्हणकर यांच्यासह पालिकेतील सर्व पक्षीय नगरसेवक उपस्थित होते. नागपाल हे भाजपा पुलगावचे महामंत्री होते यासंह त्यांच्या आई या पुलगांव नगरपालिकेच्या नगरसेवक आहेत. नागपाल हत्याकांडतील बारा आरोपीना वरोरा पोलिसांनी अटक केली आहे.

प्रकरणाचा तपास सीआयडी कडे सोपवून आरोपीना फाशीची शिक्षा देण्यात यावी अशी मागणी सगळीकडे होत आहे सोबतच प्रकरण जलदगती न्यायालयात चालवावे अशी मागणी आता जोर धरत आहे. भारत नागपाल यांची हत्या नंतर संपूर्ण पंजाबी समाजाने सुद्धा रोष व्यक्त करत निषेध केला आहे.वर्धा जिल्ह्यासह विदर्भातील अनेक शहरामध्ये पंजाबी समाजाने या घटनेचा निषेध करत कडक कारवाईची मागणी केली आहे. आज पुलगावच्या कॅण्डल मार्च मध्ये पूर्ण पंजाबी समाज उपस्थित होता.