Wardha Accident News: झोपेची डुलकी लागल्याने मोठा अनर्थ; कार पुलावरुन थेट रेल्वे रुळांवर कोसळली, वाहनाचा चक्काचूर

चेतन व्यास

Car Accident News: वर्ध्यातून अपघाताची एक मोठी बातमी समोर आली आहे. वर्धा नागपूर जिल्ह्याच्या सीमेवर भीषण अपघात झालाय. बोरखेडी शिवारात थेट पुलावरून कार खाली कोसळली आहे. या अपघातात ५ प्रवाशी गंभीर जखमी झाले आहेत. (Latest Marathi News)

मिळालेल्या माहितीनुसार, जाम नागपूर मार्गांवरील बोरखेडी शिवारात रेल्वे ओव्हरब्रिजवरून कार खाली कोसळली आहे. पुलावरून कार कोसळत थेट रेल्वे रुळावर पडली. कार थेट पुलावरून खाली पडल्याने या भीषण अपघात प्रवाशी गंभीर जखमी झालेत.

अपघातात (Accident) जखमी झालेल्या व्यक्ती एकाच कुटुंबातील असल्याचं समजलं आहे. प्रवाशी आपल्या कुटुंबासह हैद्राबाद येथून नागपूरच्या दिशेने जात होते. अशात अचानक त्यांची कार पुलावरुन खाली कोसळली. जाम महामार्गावरील अपघाताची माहिती मिळताच पोलीसांनी घटनास्थळी धाव घेतली आहे.

नागपूर जिल्ह्याच्या बुट्टीबोरी येथील माया रुग्णलयात जखमींना दाखल करण्यात आले असून त्यांच्यावर उपचार सुरु आहेत. हा अपघात इतका भीषण होता की, कार पुलावरुन खाली पडल्याने कारचा पूर्णता चेंदामेंदा झाला आहे. झोपेची डुलकी लागल्याने अपघात झाल्याची प्राथमिक माहिती जाम महामार्ग पोलीस उपनिरीक्षक दिलीप थाटे यांनी दिली आहे.

श्रेया बैस (वय 29), कवीशा काकडे, वय 27, ब्रोनदूत रोगो, वय -24, राहणार - नागपूर, मोहम्मद सादिक, वय -32, राहणार -हैद्राबाद, साईद युसूफ, वय -35,राहणार -हैद्राबाद हे वरील पाच जण जखमी आहेत. मोहम्मद सादिक हा कार चालवत होता त्याला झोपेची डुलकी लागल्याने कार अनियंत्रित होत खाली कोसळली.