Wagh Nakh Politics: वाघनखं खरी की खोटी? वाद सुरू असताना संभाजीराजे छत्रपतींनी सांगितला इतिहास

Sambhaji Raje Chhatrapati:

छत्रपती शिवाजी महाराजांची वाघनखं आणण्यासाठी राज्य सरकारमधील मंत्री सुधीर मुनगंटीवार लंडनला गेलेत. मात्र या वाघनखांवरुन राज्यातील राजकारण तापलं आहे. सत्ताधारी आणि विरोधी पक्ष एकमेंकांवर आरोप-प्रत्यारोपही करत आहेत. या वादादरम्यान छत्रपती शिवाजी महाराजांचे वंशज संभाजीराजे छत्रपती यांनी वाघनखांविषयी एक महत्त्वाचं विधान केलंय. या वादावर सरकारनं सर्व विचारधारेच्या इतिहास तज्ञांनी चर्चा करून एकमतानं मार्ग काढावा, असं संभाजीराजे यांनी म्हटलं आहे. (Latest News)

संभाजीराजे यांनी याबाबत सोशल मीडियावरुन आपली भूमिका मांडलीय. लंडन येथील संग्रहालयात असणारी वाघनखे महाराष्ट्रात तीन वर्षांच्या मुदतीवर प्रदर्शनसाठी आणले जात आहे. ही वाघनखं छत्रपती शिवाजी महाराजांनी अफजलखानच्या वधासाठी वापरली असल्याचा दावा सरकारकडून करण्यात येत आहे. मात्र अनेक इतिहास तज्ज्ञांनी त्यामध्ये दुमत व्यक्त केलं आहे. २०१७ साली मी याठिकाणी भेट दिली होती. त्यावेळी तिथे लिहिलेल्या माहिती फलकावर केवळ तशी शक्यता असल्याचं लिहिलेले दिसले. सरकारनं या विषयावर सर्व विचारधारेच्या इतिहास तज्ज्ञांशी चर्चा करून एकमताने मार्ग काढावा.

दरम्यान सातारचे छत्रपती प्रतापसिंह महाराजांनी भेट म्हणून दिलेल्या या वाघनखांश ऐतिहासिक मूल्य आहे. हे कोणी नाकारू शकत नाही. त्यामुळे आपल्या इतिहासाशी निगडीत ऐतिहासिक महत्त्व असणारे हे वाघनख केवळ तीन वर्षाच्या मुदतीवरच आणले जात आहे. मुदत संपल्यावर ते इंग्लंडला परत करावे लागेल हे वेदनादायी आहे. त्यामुळे सरकारनं वाघनख कायम स्वरुपी मूळ ठिकाणी म्हणजेच महाराष्ट्रात आणण्याचे प्रयत्न करणे अधिक गरजेचे आहे, असेही संभाजीराजे छत्रपती यांनी म्हटले आहे.