Vidhan Parishad Election:विधान परिषदेच्या 2 जागांसाठी 6 नेत्यांमध्ये रस्सीखेच, एकनाथ शिंदे कोणाला देणार संधी?

निवडणूक आयोगाने गुरुवारी विधान परिषदेच्या एकूण १० जागांसाठी निवडणूक जाहीर केली. उमेदवारीसाठी नेत्यांकडून फिल्डिंग लावण्याचे प्रयत्न सुरू आहेत. महाविकास आघाडीच्या वाट्याला एक जागा आली आहे. त्या जागेसाठी उद्धव ठाकरेंचे नाव निश्चित झाल्याचं सांगण्यात येत आहे. विधानसभेतील संख्याबळ पाहता या विधान परिषदेच्या निवडणुकीत महायुतीचं स्पष्टपणे वर्चस्व दिसत आहे.

दरम्यान निवृत्त होणाऱ्या सदस्यांमध्ये ठाकरे शिवसेनेचे पक्षप्रमुख उद्धव ठाकरे यांच्यासह विधान परिषद उपसभापती नीलम गोऱ्हे, राष्ट्रवादी काँग्रेस शरद पवार गटाचे प्रदेशाध्यक्ष शशिकांत शिंदे, राष्ट्रवादी काँग्रेसचे प्रवक्ते अमोल मिटकरी यांचा समावेश आहे. या नेत्यांना पुन्हा संधी मिळणार का, याबाबत उत्सुकता आहे. परंतु शिवसेनेच्या वाट्याला २ जागा येत असून त्यासाठी नेत्यांमध्ये रस्सीखेच सुरू आहे. यातील एका जागेसाठी नीलम गोऱ्हे यांचे नाव निश्चित असल्याचेही म्हटलं जात आहे.

शिंदे गटाकडे विधानसभेत ५७ आमदारांचे संख्याबळ असल्याने ते दोन जागा सहज जिंकू शकतात. एका जागेसाठी नाव निश्चित असल्याच म्हटलं जातंय. तर दुसऱ्या जागेसाठी रविंद्र फाटक, संजय मोरे, किरण पावसकर, शीतल म्हात्रे, शायना एनसी आणि दिपक सावंत ही नावे आघाडीवर आहेत. या दोन जागांसाठी आता सहा जणांची नाव चर्चेत आलेली आहेत.

६ नेत्यांकडून उमेदवारीसाठी जोरदार फिल्डिंग लावली जात आहे. राज्यसभा हुकलेल्या आणि लोकसभा विधानसभा निवडणुकीत पराभूत झालेल्या नेते मंडळी उमेदवारी मिळवण्यासाठी जोरदार प्रयत्न करत आहेत. त्यामुळे आता एकनाथ शिंदे नेमकं कुणाला उमेदवारी देणार याकडे साऱ्यांचे लक्ष आहे.

कुणाची नाव चर्चेत आहेत

शायना एनसी, शितल म्हात्रे, नीलम गोहे यांची नाव सध्या चर्चेत आहेत, यासह अभिजीत अडसूळ संजय मांडलिक भाऊसाहेब चौधरी यांचीही नाव चर्चेत आहेत.

दरम्यान पक्षीय बलाबलाचा विचार करता विधानसभेतील सध्याच्या आमदारांच्या संख्येनुसार एका उमेदवाराला निवडून येण्यासाठी सुमारे २८ ते २९ मतांच्या कोट्याची गरज भासणार आहे. महायुतीकडे असलेल्या संख्याबळामुळे भाजप ६ जागा सहज निवडून आणू शकते. शिवसेना (शिंदे गट) दोन आणि राष्ट्रवादी काँग्रेस (अजित पवार गट) एक तर महाविकास आघाडी एक जागा सहज जिंकू शकते.