Ulhasnagar News : उल्हासनगरमध्ये धोकादायक इमारत कोसळली; सुदैवाने मोठी दुर्घटना टळली

उल्हासनगर : उल्हासनगरमध्ये एका अतिधोकादायक इमारतीचा काही भाग कोसळल्याची घटना घडली आहे. कॅम्प ५ मधील ओल्ड नवजीवन या इमारतीचा भाग कोसळला आहे. या हि इमारत दोन महिन्यांपूर्वी खाली करण्यात आली असल्याने सुदैवाने यात कुणालाही इजा झालेली नाही.

उल्हासनगरमधील (Ulhasnagar News) कॅम्प ५ मधील ओल्ड नवजीवन ही इमारत अतिधोकादायक असल्याने महापालिकेने नोटीस देत इमारत खाली करण्यात आली होती. उल्हासनगर महानगरपालिकेने दोन महिन्यांपूर्वीच इमारत रिकामी केली होती. तसेच इमारत मालकाला ती निष्कासित करण्याची नोटीस देखील देण्यात आली होती. मात्र घर मालकाने याकडे दुर्लक्ष केलं आणि बुधवारी मध्यरात्रीच्या सुमारास या इमारतीचा अर्धा भाग कोसळला. सुदैवाने यात कुणालाही इजा झालेली नाही. 

आता महापालिकाच करणार इमारत निष्कासित 

दरम्यान, इमारत रिकामी करण्यात आली असली, तरी तळमजल्यावर काही दुकानं अजूनही सुरू असल्याचे समोर आलं आहे. त्यामुळे आता ज्या इमारती धोकादायक घोषित करून रिकाम्या केला जातील. त्यांच्यावर महापालिकेकडूनच निष्कासनाची कारवाई केली जाईल, अशी माहिती उल्हासनगर महानगरपालिकेचे सहाय्यक आयुक्त गणेश शिंपी यांनी दिली आहे.