अंबरनाथ : कंपनीतून दुकानांवर पोहोच करण्यासाठी दिलेले तब्बल १२ हजार लिटर खाद्यतेल टेम्पो चालकानेच लांबविल्याची घटना उल्हासनगरमध्ये समोर आली आहे. याप्रकरणी पोलिसात तक्रार दाखल केल्यानंतर उल्हासनगरच्या हिललाईन पोलिसांनी तपास करत टेम्पो चालकाला ताब्यात घेतले आहेत. तसेच त्याच्याकडून सुमारे ११ हजार लिटर खाद्यतेल जप्त केले आहे.
खाद्यतेलाचा होलसेल व्यापार करणारे कमल वाघाणी यांनी खोपोलीतील कंपनीतून ११ लाख ९४ हजार रुपयांचे १२ हजार लिटर प्रिया रिफाईंड सनफ्लॉवर खाद्यतेल खरेदी केलं. या तेलाची अंबरनाथच्या (Ambarnath) पटेल रिटेल प्रायव्हेट लिमिटेड यांना डिलिव्हरी करायची असल्याने खोपोलीच्या पप्पू ट्रान्सपोर्ट कंपनीच्या टेम्पोमध्ये टाकून हे खाद्य तेल ट्रान्सपोर्ट केले. एक लिटरच्या प्रत्येकी १२ पिशव्या असलेले १ हजार बॉक्स या टेम्पोत ठेवण्यात आल्यानंतर गाडी मार्गस्थ करण्यात आली होती.
दरम्यान चालक सोहेल खान याने खाद्य तेल दिलेल्या पत्त्यावर न पोहचविता परस्पर या तेलाची अफरातफर केली. तसेच नेवाळी नाका (Crime News) रस्त्यात टेम्पो सोडून पळ काढला होता. याबाबत माहिती मिळताच व्यापारी कमल वाघाणी यांनी उल्हासनगरच्या (Ulhasnagar) हिललाईन पोलीस ठाण्यात तक्रार केली. त्यानुसार पोलिसांनी तपासाची चक्रं फिरवत अमीर शेख आणि अली असगर खाटीक या दोन संशयित आरोपींना बेड्या ठोकल्या. त्यांच्याकडून ११ हजार लिटर तेल हस्तगत केले आहे. तर टेम्पो चालक सोहेल खान याचा शोध सुरू आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.