'आमच्या पायाखालची वाळू...';मुख्यमंत्र्यांच्या टीकेला शिवसेनेच्या ठाकरे गटाकडून जोरदार प्रत्युत्तर

Neelam Gorhe News : 'आमच्या पायाखालची वाळू सरकण्याचा काही प्रश्न येत नाही. मात्र वाळूचा किल्ला कोणी बांधलाय हे काळ ठरवेल. वाळूचा किल्ला एका लाटेमध्ये वाहून जाऊ शकतो, असं म्हणत शिवसेनेच्या ठाकरे गटाच्या महिला नेत्या नीलम गोऱ्हे यांनी मुख्यमंत्री एकनाथ शिंदे यांना जोरदार प्रतिउत्तर दिलं आहे. (Latest Marathi News)

नीलम गोऱ्हे (Neelam Gorhe) पुढे म्हणाल्या, 'जनतेचं प्रेम अभेद्य आहे. त्यामुळं कोणी जरी इकडे तिकडे हललं असलं तरी फरक पडत नाही, हे देखील यावेळी नीलम गोऱ्हे यांनी सांगितलं. 'निवडणुकीच्या बाबतीत प्रत्येक केसला तारीख पडतेय आणि निवडणूक आयोगावरतीच सर्वोच्च न्यायालय प्रश्नचिन्ह विचारत आहे. त्यामुळे कुणाचा कायदा चालतोय हे अदृश्य आहे. कायदा चालवणारा कळत नाही, असेही गोऱ्हे म्हणाल्या.

सायकल ट्रॅकच्या प्रश्नावर गोऱ्हे म्हणाल्या, 'मुंबई येथील सायकल ट्रेकचा प्रश्न हा बीएमसीचा अंतर्गत प्रश्न आहे. या कंत्राटदाराला बीएमसीने ब्लॅक लिस्ट केलं, तरी नागपूर महानगर पालिकेने कामे दिली आहेत. सरकारने याची सखोल चौकशी करावी सत्य समोर येईल, असं देखील यावेळी नीलम गोऱ्हे यांनी यावेळी स्पष्ट केलं आहे

मुख्यमंत्री एकनाथ शिंदे काय म्हणाले होते ?

शिवसेना पक्षप्रमुख उद्धव ठाकरे यांनी मुख्यमंत्र्यांवर बुलढाण्यात जोरदार टीका केली. त्याला मुख्यमंत्र्यांनी जोरदार प्रत्युत्तर दिले. 'आमच्या सरकारकडून जनतेच्या कामांना प्राधन्य दिले जात आहे. त्यामुळे जनता आमच्या सरकारवर समाधानी आहे. त्यामुळे विरोधी गटाकडून सरकारवर फक्त टीका होत आहे. आम्ही केलेल्या कामामुळे आम्हाला पाठिंबा मिळत असल्याचे पाहून उद्धव ठाकरे यांच्या पायाखालची वाळू सरकली आहे, अशी टीका मुख्यमंत्र्यांनी उद्धव ठाकरे यांच्यावर केली होती.