बसमध्ये चढताना महिलेचे दोन‌ लाखांचे दागिने चोरीला; पंढरपूर बसस्थानकातील घटना

पंढरपूर - एटी बसमध्ये चढताना गर्दीचा फायदा घेवून अज्ञात चोरांनी मुंबई उच्च न्यायालयातील एका वकिलाच्या पत्नीचे डायमंडसह १ लाख ९० हजार ३०० रूपये किंमतीचे सोन्याचे दागिन्यांची पर्स हातोहात लंपास केली. ही चोरीची घटना पंढरपूर येथील बसस्थानकात घडली.

याप्रकरणी अॅड. नामदेव मेटकरी यांनी पंढरपूर शहर पोलीस ठाण्यात तक्रार दिली आहे. अॅड. नामदेव मेटकरी आपल्या कुटुंबासह तीन दिवसांपूर्वी आपल्या मुळगावी‌ मंगळवेढा तालुक्यातील मेटकरवाडी येथे आले होते.दरम्यान पत्नी शीतल व मुलांना सासुरवाडीला सोडण्यासाठी पंढरपूर बसस्थानकात आले होते.

हे देखील पाहा -

दुपारी २.१० वाजता तुळजापूर - सातारा बसमध्ये पत्नी शीतल व मुले बसली. यादरम्यान, गर्दीत बसमध्ये चढताना चोरट्यांनी शीतल यांच्या मोठ्या पर्समधील दागिने ठेवलेली लहान पर्स हातचलाखीने लंपास केली. त्यामध्ये ठेवलेले ४८ हजार रूपये किंमतीचे कानातील १२ ग्रॅम सोन्याचे टॉप्स, साखळी, वेल , १४ हजारांची एक अंगठी, २४ हजारांची सोन्याची चेन, १हजार २०० रूपयांची चांदीची जोडवी, ६०० रूपयांचे चांदीचे कानातील जोड , १ हजार ५०० रूपयांचा मोबाईल चार्जर, १ हजारांची पर्स आणि १ लाख रूपये रूपये किंमतीचे रिअल डायमंड पेंडेंट व कानातील एक जोड असा एकूण १ लाख ९० हजार ३०० रूपयांचा ऐवज चोरीस गेला आहे. पंढरपूर पोलिस या चोरीचा तपास करत आहेत.

Edited By - Shivani Tichkule