Nashik Accident : नाशिकमध्ये हिट अँड रन; भरधाव डंपरनं शाळेत जाणाऱ्या ७ वीच्या मुलीला चिरडले, जागीच मृत्यू

अभिजीत सोनावणे, साम टीव्ही

चांदोरी (ता. निफाड) : नाशिकच्या चांदोरी हिट अँड रनची घटना घडलीय. भरधाव डंपरनं शाळेत सायकलवरून जाणाऱ्या विद्यार्थिनीला उडवलं. यात तिचा जागीच मृत्यू झाला आहे. सिद्धी मंगेश लुंगसे असं दुर्दैवी मुलीचं नाव आहे. या अपघातानंतर प्रचंड संताप व्यक्त करण्यात येत आहे. चांदोरी गावातील नागरिकांनी रास्ता रोको केला.

नाशिक-संभाजीनगर महामार्गावरील नागपूर फाटा परिसरात सोमवारी (ता. ३० जून) सकाळी ही संतापजनक घटना घडली. एका भरधाव डंपरनं सायकलवरून शाळेत जाणाऱ्या विद्यार्थिनीला उडवलं. (nashik hit and run schoolgirl killed) यात तिचा जागीच मृत्यू झाला. सिद्धी लुंगसे (वय १२) असं या मुलीचं नाव आहे. ती चांदोरीतील न्यू इंग्लिश स्कूलमध्ये सातवी इयत्तेत शिकत होती. या घटनेनं संपूर्ण चांदोरी परिसरात हळहळ व्यक्त केली जात आहे.

मुलीला उडवलं, नंतर दुचाकीलाही दिली धडक

अपघातानंतर डंपरने समोरून येणाऱ्या दुचाकीलाही धडक दिली. यात दुचाकीवरील पती-पत्नीला गंभीर दुखापत झालीय. त्यांच्यावर स्थानिक रुग्णालयात उपचार सुरू आहेत. डंपरचा वेग प्रचंड होता, असं प्रत्यक्षदर्शींनी सांगितलं.

संतप्त ग्रामस्थांचा रास्ता रोको

ही घटना घडताच परिसरातील नागरिकांनी तातडीने घटनास्थळी धाव घेतली. संतप्त झालेल्या गावकऱ्यांनी चांदोरी-निफाड रस्त्यावर रास्ता रोको आंदोलन केले. डंपर चालकावर तत्काळ कठोर कारवाई करा, अशी जोरदार मागणी ग्रामस्थांनी केली. या आंदोलनामुळे महामार्गावर दोन ते तीन किलोमीटरपर्यंत वाहनांच्या रांगा लागल्या होत्या. काही काळासाठी वाहतूक पूर्णपणे ठप्प झाली होती.

या अपघाताची माहिती मिळताच घटनास्थळी पोलीस पोहोचले. त्यांनी संतप्त जमावाची समजूत काढली. आंदोलकांना शांत केले. मात्र, या घटनेमुळे परिसरात तीव्र संतापाची भावना असून, प्रशासनाकडून तातडीने कठोर पावले उचलण्याची मागणी होत आहे.