Mumbai-Pune Expressway : मुंबई-पुणे एक्सप्रेस वेवर अपघात; ट्रकचा चक्काचूर, नागपूरच्या बस चालकासह तिघे जखमी

- सचिन कदम

Mumbai-Pune Expressway : मुंबई- पुणे एक्सप्रेस वेवर ट्रक आणि बस अपघातात ट्रकचा चक्काचूर झाला आहे. हा अपघात रविवारी रात्रीच्या सुमारास झाला. या अपघातामधील जखमींना एमजीएम रुग्णालयात दाखल करण्यात आले आहे. (Mumbai Pune Expressway Accident News)

या अपघाताबाबत अधिक माहिती अशी - रविवारी रात्री मुंबई पुणे एक्सप्रेस वेवर ट्रक आणि बसमध्ये विचित्र अपघात (accident) झाला. पुणे बाजूकडून मुंबईकडे जाणाऱ्या ट्रकचे ब्रेक निकामी झाल्याने चालकाचे नियंत्रण सुटून ट्रक विरुद्ध बाजुकडे पुणे लेनवर आला. (Maharashtra News)

यावेळी समोरुन येणाऱ्या खाजगी आराम बसला या ट्रकने धडक दिली. बसला जोरदार धडक देत ट्रक पलटी झाला. या अपघातामध्ये ट्रकचा चक्काचुर झाला तर बसचे देखील मोठे नुकसान झाले. बस चालकाने बस वेळीच शोल्डर लेनवर (राखीव लेन) नेल्याने आणि दरम्यान एक्सप्रेस वेवर वाहतुक कमी असल्याने मोठी दुर्घटना टळली.

या अपघातामध्ये ट्रक चालक नावेद खान (नागपूर) आणि बसमधील दोन प्रवासी गंभीर जखमी झाले. त्यांना अधिक उपचाराकरिता एमजीएम रुग्णालयात दाखल करण्यात आले आहे.

Edited By : Siddharth Latkar