Thane Water Supply : ठाण्यातील अनेक भागात पाणी पुरवठा बंद; पाईप लाईन दुरुस्तीचे काम असल्याने एक दिवस उशिराने पाणी

ठाणे : ठाण्याच्या औद्योगिक विकास महामंडळाच्या पाणी पुरवठा योजनेतंर्गत पाईप लाईन दुरुस्तीचे काम हाती घेण्यात आले आहे. हे काम पूर्ण होण्यास २४ तासांचा कालावधी लागण्याची शक्यता असल्याने या काळात ठाण्यातील अनेक भागातील पाणी पुरवठा बंद राहणार आहे. एक दिवस उशिराने पाणी पुरवठा करण्यात येणार आहे. 

ठाणे (Thane) महानगरपालिका क्षेत्रात मुंब्रा, दिवा, कळवा, माजिवडा- मानपाडा व वागळे (काही भागात) प्रभाग समितीमध्ये महाराष्ट्र औद्योगिक विकास महामंडळामार्फत पाणी पुरवठा करण्यात येतो. दरम्यान महाराष्ट्र औद्योगिक विकास महामंडळाच्या पाणी पुरवठा योजनेच्या अंतर्गत बारवी गुरूत्व वाहिनीचे कटाई नाका ते शीळ टाकी येथे दुरूस्तीचे काम हाती घेण्यात आले आहे. याचा परिणाम पाणी पुरवठ्यावर (Water Supply) होणार आहे. ठाणे शहरातील काही भागांचा पाणी पुरवठा शुकवार (२० सप्टेंबर) रात्री बारा वाजेपर्यत २४ तासांसाठी बंद ठेवण्यात येणार आहे.

या भागात पाणी पुरवठा बंद 
ठाणे महापालिकेअंतर्गत प्रभाग २६ व ३१ चा काही भाग वगळता दिवा, मुंब्रा यासह कळवा प्रभाग समितीमधील सर्व भागांमध्ये व वागळे प्रभाग समितीमधील रुपादेवी पाडा, किसन नगर नं. २, नेहरुनगर तसेच मानपाडा प्रभाग समिती अंतर्गत कोलशेत खालचा गाव येथील पाणी पुरवठा २४ तासासाठी पूर्णपणे बंद राहील. पाणी पुरवठा सुरू झाल्यानंतर पुढील १ ते २ दिवस कमी दाबाने पाणी पुरवठा होणार आहे.