Thane Crime : मैत्रिणीचे फोटो डिलीट न केल्याने युवकाची हत्या; ठाण्यातील धक्कादायक घटना

ठाणे : मोबाईलमध्ये काढलेले फोटो डिलीट न केल्याच्या किरकोळ कारणावरून युवकाची कोयत्याने वार करत हत्या करण्यात आली. सदरची धक्कादायक घटना ठाण्यातील कोपरीमधील अष्टविनायक चौक परिसरात घडली आहे. या प्रकरणी एका तरुणीसह तिच्या मित्राला पोलिसांनी ताब्यात घेतले आहे. 

स्वयम परांजपे असे सदर घटनेत मृत झालेल्या तरुणाचे नाव आहे. ठाण्यातील कोपरीमधील अष्टविनायक चौक परिसरात असलेल्या एका इमारतीमध्ये घुसून स्वयम याच्यावर कोयत्याने हल्ला करून हत्या केल्याची घटना आज सकाळी दहा वाजेच्या सुमारास घडली होती. या घटनेबाबत पोलिसांनी तपास केला असता धक्कादायक माहिती समोर आली आहे. यात मृत स्वयम याने त्याच्या मैत्रिणीचे फोटो मोबाईलमध्ये काढले होते. हे फोटो डिलीट करण्यास सांगितले होते. 

दरम्यान मैत्रिणीचे काढलेले फोटो डिलीट करण्यास सांगून देखील ते न केल्यामुळे स्वयम याची हत्या झाल्याचे तपासात समोर आले आहे. या प्रकरणी मुलीसह तिचा मित्र मयुरेश धुमाळ यास पोलिसांनी अटक केली आहे. तर या प्रकरणी कोपरी पोलिस अधिक तपास करीत आहेत.