Shahapur Water Crisis: शहापूर तालुक्यात भीषण पाणीटंचाई! पाण्यासाठी महिलांची वणवण; रात्रभर करावा लागतोय विहिरीवर मुक्काम

फय्याज शेख, मुंबई, ता. १ जून २०२४

मुंबईला पाणी पुरवठा करणारा तालुका म्हणून ओळखल्या जाणाऱ्या शहापूर तालुक्यात तीव्र पाणी टंचाई निर्माण झाली आहे. तालुक्यातील नागरिकांना पाण्यासाठी वणवण करावे लागत असून चार ते पाच किलोमीटरचा प्रवास करुन पाणी आणावे लागत आहे. अशी परिस्थिती सध्या शहापूर तालुक्यातील आदिवासी गाव पाड्यांमध्ये पाहावयास मिळत आहे.

शहापूर तालुक्यातील आदिवासी गाव पाड्यांमध्ये भीषण पाणी टंचाई पाहायला मिळत आहे. रात्र रात्र जागून पाणी भरावे लागत आहे. जर टँकर आले तर पाणी मिळते अन्यथा टँकर आला नाही तर तीन तीन दिवस नंबर लागत नाही. टँकर न आल्यास तीन तीन दिवस वाट पाहत विहिरीवर बसावे लागते. त्यामुळे निदान टँकरने तरी पाणी पुरवठा सुरळित करावा, अशी मागणी केली जात आहे.

आमच्या गावाची खूप बिकट परिस्थिती आहे. घरचे काम करायचे कि पाणी भरायचे. तीन दिवस पाणी मिळत नाही एक महिला ज्या घरात असते ती जर पाण्यासाठी गेली तर घरातील कामे होत नाहीत आणि घरी थांबली तर पाणी मिळत नाही, असे यावेळी स्थानिकांनी सांगितले. तसेच प्रशासनाने याकडे लक्ष द्यावे, टँकरने पाणी पुरवठा सुरळित करावा, अशी मागणीही केली.

विदर्भाचं नंदनवनअसलेल्या अमरावती जिल्ह्यातील चिखलदरा शहर थंड हवेचे ठिकाण आहे. परंतु सध्या या ठिकाणी पाण्याची मोठी भीषण समस्या निर्माण झाली असून चिखलदरा शहराला पाणीपुरवठा करणारे शक्कर तलाव व काला पाणी हे दोन्ही मुख्य स्रोत असलेले तलाव आहेत. हे दोन्ही तलाव सध्या पूर्णपणे आटले असून या दोन्ही तलावांमध्ये थोडही पाणी शिल्लक राहिलेल नाही. त्यामुळे सध्या चिखलदरा शहराला आमझरी इथून पाणीपुरवठा केला जात आहे.