Deepak Kesarkar: 'कॉंग्रेस NCP सोबत जाऊन चुकलो; मोदींसमोर उद्धव ठाकरेंची कबुली...' दिपक केसरकरांचा गौप्यस्फोट

Kolhapur: काल खेडच्या गोळीबार मैदानावर मुख्यमंत्री एकनाथ शिंदे (Eknath Shinde) यांची जाहीर सभा पार पाडली. या सभेतून एकनाथ शिंदेंसह शिंदे गटाच्या नेत्यांनी ठाकरेंवर जोरदार हल्लाबोल केला. राज्याच्या राजकारणात सध्या या सभेची चर्चा सुरू असतानाच शिंदे गटाचे नेते दिपक केसरकर यांच्या एका विधानाने खळबळ उडाली आहे.

"काँग्रेस आणि राष्ट्रवादीसोबत गेलो ही चूक झाली. मुंबईत गेल्यावर चूक दुरुस्त करतो, अशी कबुली उद्धव ठाकरे यांनी पंतप्रधान नरेंद्र मोदी यांच्याकडे दिली होती," असा खळबळजनक गौप्यस्फोट राज्याचे शालेय शिक्षण मंत्री दीपक केसरकर (Deepak Kesarkar) यांनी केला आहे.

याबाबत अधिक माहिती अशी की, मुख्यमंत्री एकनाथ शिंदे यांच्या रत्नागिरीतील खेडमधील सभेपूर्वीच दीपक केसरकर कोल्हापूर येथे आले होते. यावेळी बोलताना त्यांनी उद्धव ठाकरेंवर (Udhav Thackeray) जोरदार टीका केली. "काँग्रेस आणि राष्ट्रवादीसोबतची आघाडी तोडा हे आम्ही पुन्हा पुन्हा सांगत होतो. आम्ही फसवलं नाही. तुम्हीच आम्हाला सांगितलं, तुम्ही निघून जा. आणि आता जनतेला खोटं सांगत आहात. खोटं तरी बोलू नका," असा इशारा त्यांनी यावेळी केला.

"तुम्ही स्वत: पंतप्रधानांसमोर कबुल केलं होतं की काँग्रेस आणि राष्ट्रवादीसोबत गेल्याची तुमच्याकडून चूक झाली. हिंदुत्वाचा विचार सोडण्याची चूक झाली आहे. महाराष्ट्रात गेल्याबरोबर मी चूक दुरुस्त करेन, असं आश्वासन देऊन तुम्ही दिल्लीतून आला. पण इथं आल्यावर तुम्ही शब्द मोडलेला असेल तर कोणी कुणाला फसवलं हे राज्यातील जनतेला समजलं पाहिजे, "असा खळबळजनक गौप्यस्फोट दीपक केसरकर यांनी केला. (Latest Marathi News)