Sanjay Raut News : भाजपचा प्रत्येक बालेकिल्ला उध्वस्त करू; कसब्यातील धंगेकरांच्या विजयानंतर संजय राऊत गरजले

रणजीत माजगांवकर

Sanjay Raut News : भाजप आणि महाविकास आघाडीसाठी प्रतिष्ठेच्या असलेल्या कसबा पेठमधून काँग्रेसच्या रवींद्र धंगेकरांनी भाजपच्या हेमंत रासने यांचा पराभव केला आहे. महाविकास आघाडीचे उमेदवार रवींद्र धंगेकर यांच्या विजयानंतर भाजपला मोठा धक्का बसला आहे. कसबा पेठ पोटनिवडणुकीत रवींद्र धंगेकर यांचा विजय झाल्यानंतर ठाकरे गटाचे खासदार संजय राऊत यांनी पहिली प्रतिक्रिया दिली आहे.

'भाजपचा प्रत्येक बालेकिल्ला उध्वस्त करू, अशा शब्दात संजय राऊत यांनी धंगेकरांच्या विजयावर पहिली प्रतिक्रिया दिली आहे. (Latest Marathi News)

ठाकरे गटाचे खासदार संजय राऊत सध्या कोल्हापूरच्या दौऱ्यावर आहेत. या दौऱ्यादरम्यान संजय राऊत यांनी प्रसारमाध्यमांशी संवाद साधला. यावेळी संजय राऊत यांनी भाजपवर जोरदार हल्लाबोल केला.

संजय राऊत म्हणाले, 'कसब्यातील निकाल म्हणजे परिवर्तनाची नांदी आहे. देवेंद्र फडणवीस यांना आता कळाले असेल की खरी शिवसेना कुठे आहे. चिंचवडमध्ये तिसरा उमेदवार उभा करून भाजपनं मतांची फाटाफूट केली. भाजपबरोबर आतापर्यंत शिवसेना होती म्हणून भाजपचे बालेकिल्ले सुरक्षित होते. इथून पुढं भाजपचा प्रत्येक बालेकिल्ला उध्वस्त करू'.

कसब्यात झालेला विजय फार बोलका आहे : आदित्य ठाकरे

दरम्यान, कसबा पेठ निवडणुकीतील रवींद्र धंगेकर यांच्या विजयावर ठाकरे गटाचे नेते, आमदार आदित्य ठाकरे यांनी देखील प्रतिक्रिया दिली आहे. आदित्य ठाकरे म्हणाले, 'महाराष्ट्रात जे काही सुरू आहे ते जनतेला मान्य नाही. कसबा मध्ये आमचा विजय झाला आहे.वाढती महागाई आहे. महाराष्ट्रातले निघून चाललेले उद्योग आहेत'.