Vinayak Raut : 'राज ठाकरे सुपारी घेऊन बोलतात'; खासदार विनायक राऊत यांची सडकून टीका

जीतेश कोळी

Vinayak Raut News : ठाकरे गटातील खासदार विनायक राऊत यांनी मनसे अध्यक्ष राज ठाकरे यांच्या वक्तव्याचा खरपूस समाचार घेतला. राज ठाकरे हे सुपारी घेऊन बोलतात. महाराष्ट्रातील प्रकल्प गुजरातला जात आहेत हे त्यांना कळत नाही हे मनसे पक्षाचं दुर्दैव आहे, अशी टीका खासदार विनायक राऊत यांनी यावेळी केली. (Latest Marathi News)

उद्धव ठाकरे गटातील शिवसेनेचे खासदार विनायक राऊत यांनी चिपळूण येथे प्रसारमाध्यमांशी संवाद साधला. त्यावेळी विनायक राऊत यांनी राज ठाकरे यांच्यावर निशाणा साधला. महाराष्ट्रातील १-२ प्रकल्प गुजरातला जाण्याणे काही फरक पडत नाही, असे वक्तव्य राज ठाकरे यांनी केलं. त्यावरून विनायक राऊत यांनी राज ठाकरे यांच्यावर जोरदार टीका केली.

विनायक राऊत म्हणाले, 'राज ठाकरे यांनी सुपारी घेऊन बोलायचा धंदा सुरू केला आहे. राज्यातून २ नव्हे तर ५ मोठे प्रकल्प गुजरात आणि दिल्लीमध्ये गेले आहेत. त्या प्रकल्पांच्या जोरावरच पंतप्रधान नरेंद्र मोदी यांनी गुजरातची निवडणूक जिंकली. महाराष्ट्र कंगाल करून गुजरातचं भलं केलं. राज ठाकरे याकडे गांभीर्याने पाहात नाहीत हे मनसेचे दुर्दैव आहे'.

अजित पवार यांचीही राज ठाकरेंवर टीका

दरम्यान, विरोधी पक्षनेते अजित पवार यांनी देखील मनसे अध्यक्ष राज ठाकरे यांच्या उद्योगावरील वक्तव्यावर प्रतिक्रिया दिली. राज ठाकरे म्हणाले होते, 'महाराष्ट्र हा सर्वार्थाने श्रीमंत आहे. त्यामुळे एखादा उद्योग बाहेर गेल्याने फरक पडत नाही'. राज ठाकरे यांच्या या वक्तव्यावर प्रतिक्रिया देताना अजित पवार म्हणाले, 'राज्यातील एक जरी उद्योग बाहेर गेला तर प्रचंड नुकसान होतं. त्यामुळे कोणत्याही नेत्यांनी दोन-चार उद्योग बाहेर गेले म्हणून काय झाले, असे वक्तव्य करू नये'.