Vaibhav Naik: राजकोट किल्ल्यावरील छत्रपती शिवाजी महाराजांचा पुतळा कोसळला, आमदार वैभव नाईक यांनी PWD कार्यालय फोडलं

विनायक वंजारे, साम टीव्ही, प्रतिनिधी

मालवण येथील राजकोट किल्ल्यावर बांधण्यात आलेला छत्रपती शिवाजी महाराज यांचा पुतळा कोसळल्याची घटना घडली आहे. यानंतर ठाकरे गटाचे आमदार वैभव नाईक आक्रमक झाल्याचं पाहायला मिळालं आहे. महाराजांचा पुतळे कोसळ्यानंतर वैभव नाईक यांनी मालवण येथील सार्वजनिक बांधकाम विभागाच्या कार्यालयाची तोडफोड केली आहे.

पुतळ्याची देखभाल व निगा राखण्याचं काम सार्वजनिक बांधकाम विभागाकडे आहे. यातच महाराजांचा पुतळा कोसळल्याने वैभव नाईक यांना संताप अनावर झाल्याचं पाहायला मिळत आहे. त्यांनी थेट मालवण येथील सार्वजनिक बांधकाम विभागात जात तोडफोड केली आहे.

या घटनेचा व्हिडिओही समोर आला आहे. या व्हिडिओत आमदार वैभव नाईक सार्वजनिक बांधकाम विभागाच्या कार्यलयात बॅट घेऊन शिरताना दिसत आहेत. याच बॅटने त्यांनी संतापात तोडफोड केली आहे.

रवींद्र चव्हाण आणि इतर अधिकाऱ्यांवर फौजदारी कारवाई करावी करा, विनायक राऊत यांची मागणी

दरम्यान, राजकोट किल्ल्यावर बांधण्यात आलेला छत्रपती शिवाजी महाराज यांचा पुतळा कोसळल्या प्रकरणी ठाकरे गटाचे नेते आक्रमक झाल्याचं पाहायला मिळत आहे. यातच ठाकरे गटाचे माजी खासदार विनायक राऊत यांनी याप्रकरणी मंत्री रवींद्र चव्हाण आणि इतर अधिकाऱ्यांवर फौजदारी कारवाई करण्याची मागणी केली आहे. त्यांनी एका पत्राद्वारे ही मागणी केली आहे.

या पत्रात विनायक राऊत म्हणाले आहेत की, ''या दुर्घटनेत शिवरायांच्या अवमानास जबाबदार असणाऱ्या महाराष्ट्र राज्याचे सार्वजनिक बांधकाम मंत्री रवींद्र चव्हाण व ईतर अधिकाऱ्यांवर पोलीस फौजदारी कारवाई करावी. काही महिन्यांपूर्वी नेव्ही डेच्या निमित्ताने ०४ डिसेंबर २०२३ रोजी सर्जेकोट, तालुका मालवण येथे छत्रपती शिवाजी महाराजांच्या पूर्णाकृती पुतळ्याचे अनावरण देशाचे पंतप्रधान नरेंद्र मोदी यांच्या हस्ते झाले. शिवरायांचे स्मारक उभारताना ज्या प्रतीकात्मक उपाययोजना करण्याची आवश्यकता होती.'' याप्रकरणी त्यांनी मुख्यमंत्री एकनाथ शिंदे आणि सार्वजनिक बांधकाम मंत्री रविंद्र चव्हाण यांच्या राजीनाम्याची मागणीही केली आहे.