TET Paper Leak: टीईटी पेपरफुटी प्रकरणात मोठी कारवाई; मुख्य सूत्रधारासह १८ जणांना बेड्या, राज्यभरात रॅकेट?

शिक्षक पात्रता परीक्षा (TET) दरम्यान कोल्हापूर (Kolhapur) जिल्ह्यात पेपरफुटीच्या मोठ्या रॅकेटचा पर्दाफाश झाला. कागल तालुक्यातील मुरगुड पोलिसांनी केलेल्या कारवाईत पाच शिक्षकांसह एकूण १८ जणांना अटक करण्यात आलीय. दरम्यान या टोळीचा मुख्य सूत्रधार महेश गायकवाडलाही पोलिसांनी बेड्या ठोकल्या आहेत. दरम्यान या रॅकेटची व्याप्ती राज्यभर असण्याची शक्यता वर्तवण्यात येत आहे.

मुरगुड पोलीस ठाण्यात पेपरफुटी प्रकरणात गुन्हा नोंदवण्यात आला आहे. टीईटी परीक्षा राज्यातील शिक्षक भरतीसाठी अत्यंत महत्त्वाची मानली जाते. पण हीच परीक्षेत पेपर फोडणारी टोळी कोल्हापूरमध्ये सक्रिय असल्याचे उघड झाल्याने शिक्षण क्षेत्रात खळबळ उडालीय. दरम्यान गुप्त माहितीच्या आधारे पोलिसांनी कागल तालुक्यातील सोनगे येथील एका फर्निचर मॉलवर छापा टाकला होता.

येथे टीईटी परीक्षेचा छायांकित पेपर विद्यार्थ्यांना ३ लाख रुपयांना विकला जात असल्याचा धक्कादायक प्रकार समोर आला. पोलसांनी याप्रकरणी सुरुवातीला नऊ जणांना ताब्यात घेतलं. पुढील तपासात या रॅकेटचा व्याप वाढत गेली. आता अटक केलेल्यांची संख्या १८ वर पोहोचली आहे. अटक करण्यात आलेल्यांमध्ये कोल्हापूर जिल्ह्यातील पाच शिक्षकांचाही समावेश आहे. त्यामुळे शिक्षण विभागानेही संबंधित शिक्षकांची माहिती मागवून पुढील कारवाईची तयारी सुरू केलीय.

राज्यभरात रॅकेट?

शनिवारी राज्यातील लाखो उमेदवारांनी टीईटी परीक्षा दिली. अनेक परीक्षा केंद्रांवर परीक्षा सुरळीत सुरू होत्या. मात्र कोल्हापूरमध्ये पेपर फोडण्याचा प्रयत्न झाला. दरम्यान याची माहिती मिळताच शिक्षण विभागासह पोलिस यंत्रणा अलर्ट झालीय. पोलिसांनी ताब्यात घेतलेल्या आरोपींपैकी काहीजण परीक्षार्थी शिक्षक आहेत. त्यांचा या रॅकेटशी संबंध असल्याचे प्राथमिक तपासात स्पष्ट झालंय.

आरोपी सर्वजण कागल आणि राधानगरी तालुक्यातील आहेत. तर आणखी काही संशयितांची नावे समोर येण्याची शक्यता पोलिसांनी व्यक्त केलीय. मुरगुड पोलीस आणि स्थानिक गुन्हे अन्वेषण पथकाने रात्रभर तपास सुरू ठेवलाय. दरम्यान या रॅकेटची व्याप्ती राज्यभर पसरली असण्याची शक्यता पोलिसांनी व्यक्त केलीय.