LokSabha Election 2024 : शांतीगिरी महाराज पुन्हा लोकसभेच्या रिंगणात; नाशिकमध्ये स्वतः उमेदवारी केली जाहीर

सचिन बनसोडे

Nashik News :

स्वामी शांतीगिरी महाराजांच्या नेतृत्वात जय बाबाजी भक्त परिवाराने आगामी लोकसभा निवडणुकीत उतरण्याचा निर्णय घेतला आहे. स्वतः शांतीगिरी महाराज नाशिक लोकसभा लढवणार असल्याची घोषणा करण्यात आली आहे. जय बाबाजी भक्त परिवाराकडून नाशिकसह आणखी सहा मतदारसंघात देखील उमेदवार उभे केले जाणार आहेत, अशी माहिती समोर आलीये.

महामंडलेश्वर स्वामी शांतीगिरी महाराज यांच्या मार्गदर्शनाखाली जय बाबाजी भक्त परिवारातील प्रमुख प्रचारकांची बैठक शिर्डी येथे संपन्न झाली. या बैठकीत "लढा राष्ट्रहिताचा, संकल्प शुद्ध राजकारणाचा " हा नारा घेऊन आगामी लोकसभा निवडणुकीत उमेदवार उभे करण्याचा निर्णय घेण्यात आला.

स्वतः शांतीगिरी महाराज नाशिक लोकसभा निवडणुक लढवणार असून यासह दिंडोरी, जळगाव, धुळे, छत्रपती संभाजी नगर, जालना आणि शिर्डी अशा सात मतदारसंघात उमेदवार उभे केले जाणार असल्याची घोषणा शांतीगिरी महाराजांनी केली आहे.

राज्यभरात जय बाबाजी भक्त परिवार मोठ्या संख्येने असून यापूर्वी शांतीगिरी महाराजांनी औरंगाबादमध्ये लोकसभा निवडणूक लढवली होती. मात्र त्यांना पराभवाचा सामना करावा लागला होता. आता मात्र त्यांनी नाशिक लोकसभा निवडणूक लढवण्याचा निर्धार केला असून राजकारणाच्या शुद्धीकरणासाठी आपण उमेदवारी करत असल्याची प्रतिक्रिया शांतीगिरी महाराजांनी दिली आहे.