Shocking : बापाची हत्या केली अन् मृतदेह घरातच पुरला, दुर्गंधीनंतर लेकाचं बिंग फुटलं, संभाजीनगर हादरलं

पैठणमधून धक्कादायक बातमी समोर आली आहे. एका पोटच्या मुलाने स्वतःच्या वडिलांची हत्या केली. धक्कादायक म्हणजे हा निर्दयी तरुण एवढ्यावरच थांबला नाही तर त्याने वडिलांची हत्या करून त्यांचा मृतदेह जमिनीत गाढला. आठवडा उलटून गेल्यानंतर ही घटना उघडकीस आली आहे. या घटनेने परिसरात खळबळ उडाली असून भीतीचे वातावरण निर्माण झाले आहे. पोलीस या घटनेचा तपास करत आहेत. मृत व्यक्तीचे नाव कल्याण बाबुराव काळे असून त्यांच्या मुलाचे नाव रामेश्वर कल्याण काळे असे आहे.

मिळालेल्या माहितीनुसार, पैठण तालुक्यातील कडेठाण येथे राहणाऱ्या कल्याण काळे आणि त्यांचा मुलगा रामेश्वर काळे यांचा शुल्लक कारणावरून वाद झाला होता. या वादातून संतापलेल्या रामेश्वरने जन्मदात्याची हत्या केली. मात्र हत्या केल्यानंतर ते कोणालाही समजू नये म्हणून निर्दयी रामेश्वरने वडिलांचा मृतदेह घरातच जमिनीत पुरला.

हत्येनंतर आठवडा उलटून गेल्यानंतर रामेश्वरच्या घरात दुर्गंधी सुटली. शेजाऱ्यापाजाऱ्यांना या दुर्गंधीचा त्रास होऊ लागला. त्यानंतर शेजाऱ्यांनी याबाबत पोलिसांना कळवले असता पोलिसांनी काळे यांच्या घराची झडती घेतली. या तपासानंतर रामेश्वरने केलेला गुन्हा उघडकीस आला. याबाबत पाचोड पोलिस ठाण्यात गुन्हा नोंद करण्यात आला आहे.

पैठण महसूल व वैद्यकीय पथकाच्या उपस्थितीत उपविभागीय पोलीस अधिकारी सुनील पाटील यांनी घटनास्थळी धाव घेतली. पाचोड पोलीस ठाण्याचे सहायक पोलीस निरीक्षक सचिन पंडित यांच्या मार्गदर्शनाखाली खड्यातून मृतदेह बाहेर काढला आहे. याप्रकरणात पोलिसांनी मृत कल्याण यांच्या मुलाला त्यांच्या हत्येसाठी बेड्या ठोकल्या आहेत. या घटनेने परिसरात खळबळ उडाली आहे.