'उत्तम जानकर यांनी मागील ५ वर्षांत मोहिते-पाटील कुटुंबाला खूप त्रास दिला आहे. वैयक्तिक माझावर खोटे गुन्हे दाखल केले.', अशी खंत माजी उपमुख्यमंत्री विजयसिंह मोहिते पाटील यांचे बंधू जयसिंह मोहिते पाटील यांनी व्यक्त केली. 'लोकसभा निवडणुकीत उत्तम जानकर यांनी मदत केली, पण त्यांच्या कार्यकर्त्यांनी मदत केली नाही.' अशी नाराजी देखील जयसिंह मोहिते पाटील यांनी जाहिररित्या बोलून दाखवली.
उत्तम जानकर यांना माळशिरसमधून राष्ट्रवादी काँग्रेस शरदचंद्र पवार पक्षाने उमेदवारी दिली आहे. जानकर यांच्या प्रचारसभेत बोलताना जयसिंह मोहिते पाटील यांनी उत्तम जानकर यांच्या विषयीच नाराजी व्यक्त केली. त्यामुळे राजकीय वर्तुळामध्ये चर्चांना उधाण आले आहे. सध्या सोलापूरमध्ये उत्तम जानकर यांच्या जोरदार प्रचार सभा सुरू आहेत.
उत्तम जानकर आणि मोहिते पाटील लोकसभा निवडणुकीत एकत्रित आले आहेत. विधानसभेला उत्तम जानकर यांना मदत करण्याचा शब्द मोहिते पाटील यांनी दिला होता. त्यानुसार उत्तम जानकर यांना राष्ट्रवादी काँग्रेस शरदचंद्र पवार पक्षाची उमेदवारी दिली आहे. लोकसभा निवडणुकीत खासदार धैर्यशील मोहिते पाटील यांना माळशिरस तालुक्यातून एक लाखांचे मताधिक्य मिळणे अपेक्षित असताना ते 70 हजारांवर आले. ३० हजार मतं कुठे गेली असा सवाल उपस्थित करत तुमच्या कार्यकर्त्यांनी विरोधात मतदान केल्याचं जयसिंह मोहिते पाटील यांनी उत्तम जानकरांना सुनावले.
तसंच, 'मोहिते पाटीलांनी एकदा शब्द दिला की तो पाळला जातो. विधानसभा निवडणुकीत उत्तम जानकर यांना एक लाख पाच हजार इतके मताधिक्य मिळवून देऊ.' असं आश्वासन देखील जयसिंह मोहिते पाटील यांनी दिले. मोहिते पाटील आणि जानकर एकत्रित आले असले तरी जुने राजकीय वाद आणि वैर या निमित्ताने उकरून काढले जात आहेत. त्यामुळे सध्या दोन्ही नेत्यांमध्ये प्रचारादरम्यान एकमेकांवर टोलेबाजी होत असल्याचे दिसत आहे.
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.