माझी साक्षी कुठं गेली? कॉलेजवरून घरी आली, खोलीत गेल्यानंतर...; MBBS च्या विद्यार्थिनीची आत्महत्या, आईने फोडला टाहो

Summary:

• सोलापूरमध्ये एमबीबीएसच्या विद्यार्थिनीची आत्महत्या

• सोलापुरमधील आयएमएस शाळेजवळ ही घटना घडली

• राहत्या घरात गळफास घेत आयुष्य संपवलं

• सोलापूर पोलिसांकडून घटनेचा तपास सुरू

विश्वभूषण लिमये, सोलापूर

सोलापुरमध्ये एमबीबीएसचे शिक्षण घेणाऱ्या विद्यार्थिनीने आत्महत्या केल्याची धक्कादायक घटना घडली. राहत्या घरात गळफास घेऊन या विद्यार्थिनीने आयुष्य संपवले. कॉलेजवरून घरी आली. त्यानंतर अभ्यास करण्यासाठी ती आपल्या खोलीत गेली. त्याचवेळी तिने टोकाचे पाऊल उचत गळफास घेतला. मंगळवारी दुपारी १२ वाजताच्या सुमारास ही घटना उघडकीस आली. या विद्यार्थिनीच्या आत्महत्याचे कारण अस्पष्ट आहे. सध्या सोलापूर पोलिस या प्रकरणाचा तपास करत आहेत.

मिळालेल्या माहितीनुसार, साक्षी सुरेश मैलापुरे (२५ वर्षे) असं आत्महत्या केलेल्या विद्यार्थिनीचे नाव आहे. साक्षी एमबीबीएसच्या तिसऱ्या वर्षामध्ये शिक्षण घेत होती. साक्षीने मंगळवारी राहत्या घरात स्कार्फच्या सहाय्याने गळफास घेत आत्महत्या केली. जुळे सोलापूर येथील आयएमएस शाळेजवळ ती आपल्या कुटुंबीयांसोबत राहत होती. साक्षी सोलापुरातील डॉ. वैशंपायन स्मृती शासकीय वैद्यकीय महाविद्यालयात तिसऱ्या वर्षात शिकत होती. साक्षीच्या आत्महत्येमुळे कुटुंबीयांना मोठा धक्का बसला.

साक्षीचे वडील सुरेश मैलापूर हे वीज वितरण कंपनीत अधिकारी म्हणून काम करतात. तिची मोठी बहीण पुण्यात वैद्यकीय शिक्षण घेत आहे. साक्षी अभ्यासात हुशार होती. दोन्ही वर्षे ती चांगले गुण घेऊन उत्तीर्ण झाली होती. सोमवारीच तिची पूर्व परीक्षा संपली होती. मंगळवारी नेहमीप्रमाणे साक्षीचे वडील कामावर गेले होते. आई आणि साक्षीच घरामध्ये होते. साक्षी कॉलेजवरून आपल्या खोलीमध्ये अभ्यास करत होती. तर तिची आई घरात काम करत होती. बराच वेळ झाला साक्षी खोलीतून बाहेर आली नाही त्यामुळे तिच्या आईने दरवाजा वाजवला.

साक्षीकडून आतून काहीच प्रतिसाद आला नाही. त्यांना वाटले ती झोपली असेल त्यामुळे त्यांनी तिच्या मोबाइलवर कॉल केला. तर साक्षीने कॉल घेतला नाही त्यामुळे तिची आई प्रचंड घाबरली. तिने शेजारच्यांना बोलावून आणले. त्यानंतर सर्वांनी दरवाजा उघडला तेव्हा त्या सर्वांना धक्का बसला. साक्षीने स्कार्पच्या सहाय्याने गळफास घेतला होता. साक्षीला पंख्याला लटकताना पाहून तिची आई चक्कर येऊन खाली पडली. साक्षीला तात्काळ रुग्णालयात नेण्यात आले पण तोपर्यंत उशिर झाला होता. डॉक्टरांनी साक्षीला मृत घोषीत केले. या घटनेनंतर विजापूर नाका पोलिस ठाण्यात साक्षीच्या आत्महत्येची नोंद करण्यात आली असून पोलिस तपास करत आहेत. साक्षीने आत्महत्या का केली? असा प्रश्न सर्वांनाच पडला आहे.