Solapur : पंढरपूरमध्ये दुर्दैवी घटना! विहिरीचा कठडा कोसळून ४ मजुरांचा मृत्यू

भरत नागणे, पंढरपूर

पंढरपूर तालुक्यातील आंबे गावात विहिरीचे काम सुरू असताना मोठी दुर्घटना घडली आहे. विहिरीचा कठडा अचानक कोसळल्याने त्याखाली दबून चार मजुरांचा मृत्यू झाला. या घटनेमुळे आंबे गावासह संपूर्ण परिसरात शोककळा पसरली आहे.

मिळालेल्या माहितीनुसार, आंबे गावातील शेतकरी निवास शिंदे यांच्या शेतात नवीन विहीर खोदण्याचे काम सुरू होते. यासाठी काही मजूर विहिरीत उतरून काम करत होते. काम सुरू असतानाच अचानक विहिरीचा कठडा कोसळला. त्यामुळे विहिरीत काम करणाऱ्या मजुरांना बाहेर पडण्याची संधीही मिळाली नाही. काही क्षणांतच ते मातीच्या ढिगाऱ्याखाली गाडले गेले.

ही घटना समजताच परिसरातील ग्रामस्थांनी घटनास्थळी धाव घेतली. त्यांनी तातडीने मजुरांना बाहेर काढण्यासाठी प्रयत्न सुरू केले. मात्र, मोठ्या प्रमाणात मातीचा ढिगारा कोसळल्याने बचावकार्यात अडचणी आल्या. या दुर्घटनेत चारही मजुरांचा मृत्यू झाल्याचे समोर आले आहे. या अपघातात मंगेश मोरे आणि सिद्धेश्वर घाडगे, तसेच तानाजी घोडके आणि आबा घोडके यांचा मृत्यू झाला आहे. चार मजुरांच्या मृत्यूमुळे त्यांच्या कुटुंबीयांवर दुःखाचा डोंगर कोसळला आहे.

घटनेची माहिती मिळताच पोलीस घटनास्थळी दाखल झाले. ग्रामस्थांच्या मदतीने मृतदेह बाहेर काढण्याचे काम सुरू करण्यात आले. बचावकार्यासाठी एनडीआरएफच्या पथकालाही पाचारण करण्यात आले आहे. दरम्यान, विहिरीचे काम सुरू असताना घडलेल्या या दुर्घटनेमुळे परिसरात हळहळ व्यक्त केली जात आहे. चार मजुरांच्या अचानक झालेल्या मृत्यूने गावावर शोककळा पसरली आहे.