Solapur fire : सोलापुरात टॉवेल कारखान्यात अग्नितांडव, ८ जणांचा मृत्यू, कुटुंबाचाही गुदमरून मृत्यू

Solapur MIDC fire News : सोलापुरातील अक्क्लकोटच्या एमआयडीसी रोडमधील सेंट्रल कारखान्यात रविवारी सकाळी भीषण आग लागल्याची घटना घडली. या दुर्दैवी घटनेत कारखान्यातील ८ जणांचा गुदमरून मृत्यू झाला आहे. कारखान्यातील ८ जणांच्या मृत्यूने त्यांच्या कुटुंबीयांवर दु:खांचा डोंगर कोसळला आहे. कामगारांच्या मृत्यूने सोलापुरात खळबळ उडाली आहे.

सोलापूरच्या अक्कलकोट एमआयडीसी रोडमधील टॉवेल कारखान्याला लागलेल्या आगीत तब्बल ८ जणांचा गुदमरून मृत्यू झाला. या कारखान्यात अडकलेल्या लोकांना बाहेर काढण्यात आले. मात्र, कारखान्यातील ८ लोकांचा मृत्यू झाला आहे. कारखान्याला पहाटे लागलेल्या आगीत तीन कामगारांचा मृत्यू झाला होता. आता मृतांच्या आकड्यात वाढ झाली.

सेंट्रल इंडस्ट्रीजचे मालक देखील कारखान्यात अडकले होते. त्यांनाही शोधण्याचं कार्य सुरु करण्यात आलं. कारखान्यातील ५ जण मास्टर बेडरुममध्ये लपून बसले होते. या पाच जणांन दुर्दैवाने कारखान्याच्या बाहेर पडता आलं नाही. त्यामुळे त्यांचा श्वास गुदमरून आणि होरपळून जागीच मृत्यू झाला.

सर्व आठही मृतदेह सर्व विच्छेदनासाठी सोलापूरच्या शासकीय रुग्णालयाकडे पाठवण्यात आले आहेत. यामध्ये ५ पुरुष, २ महिला आणि एका बालकाचा अंत झाला आहे. या प्रकरणाची सविस्तर चौकशी करण्याची विनंती सरकारला करण्यात आली आहे. या प्रकरणात महापालिकेची यंत्रणा काही प्रमाणात कमी पडल्याचा आरोप करण्यात आहे. आग विझविण्यासाठी वेळोवेळी पाणी कमी पडत होते. त्यानंतर जिल्हाधिकाऱ्यांना फोन करून खासगी टँकरद्वारे पाणी मागून घेतला आहे.