Sangli : कत्तलीसाठी नेणाऱ्या ४१ गोवंशाची सुटका; ४२ लाखांहून अधिक मुद्देमाल इस्लामपूर पोलिसांकडून जप्त

विजय पाटील

Smuggling of Animals :

गोवंश कत्तल करण्यावर बंदी घालण्यात आली आहे. मात्र तरी देखील काही ठिकाणी अवैधरित्या कत्तल केली जाते. अशा घटना रोखण्यासाठी पोलीस यंत्रणा सज्ज आहेत. मात्र तरी देखील राज्यात अनेक जिल्ह्यांमध्ये गोवंश कत्तलीच्या घटना उघडकीस येत आहेत.

सांगलीमध्ये देखील अशीच एक घटना उघडकीस आलीये. कत्तल करण्याच्या उद्देशाने टेम्पोतून नेण्यात येणाऱ्या तब्बल ४१ जनावरांची सुटका करण्यात इस्लामपूर पोलीसाच्या पथकाला यश आले आहे. स्थानिक गुन्हे अन्वेषणच्या पथकाच्या मदतीने ही कारवाई वाळवा तालुक्यातील पेठनाका परिसरात करण्यात आली. यामध्ये दोन टेम्पोसह गोवंश असा ४२ लाख १० हजारांचा मुद्देमाल पोलिसांनी हस्तगत केला.

याप्रकरणी पोलिसांनी दोघांना ताब्यात घेतले आहे. सचिन निवास साळुंखे (रा. पेठनाका), सचिन विनोद वारे (रा. आष्टा), उमेश उर्फ राजू बापूसाहेब धुमाळ (रा. धुमाळवाडी, ता. शिराळा) आणि दिलीप महादेव गायकवाड (रा. शिराळा) यांना ताब्यात घेतलेल्याची नावे आहेत.

पेठनाका परिसरात गस्त घालत असताना दयानंद अकॅडमीसमोर एका ठिकाणी गोवंश जातीची जनावरे कत्तल करण्याच्या उद्देशाने ठेवली होती. त्यांची टेम्पोतून वाहतूक होणार असल्याची माहिती पोलिसांना मिळाली होती. त्यानुसार पोलिसांनी सापळा रचत छापा टाकला. त्यावेळी एका शेडमध्ये व टेम्पोमध्ये 3 दाटीवाटीने ३४ जनावरे बांधल्याचे निदर्शनास आले. तसेच इस्लामपूर पोलिस ठाणे हद्दीतच गोवंश वाहतूक करणारा टेम्पो गुन्हे अन्वेषणच्या दुसऱ्या पथकाने ताब्यात घेतला.

नाशिकच्या येवला शहरातील नांदेसर परिसरात देखील गेल्या महिन्यात अशीच कारवाई करण्यात आली होती. कोपरगाव येथून येवल्यात अवैधरित्या कत्तलीसाठी गोवंश जातीची जनावरे घेऊन येत असलेल्याची माहिती पोलिसांना सूत्रांकडून मिळाली होती. त्यानंतर गोरक्षक व पोलिसांनी नांदेसर रेल्वे गेट जवळ गाडी पकडली. सकाळच्या समारास ही घटना घडली असून पकडलेल्या गाडीतून सात जनावरांची सुटका करण्यात आली होती.