Sindhudurg Accident : सिंधुदुर्गमध्ये भीषण अपघात! भरधाव बस आणि रिक्षाची जोरदार धडक, वाहनांचा चक्काचूर; चौघांचा जागीच मृत्यू

विनायक वंजारे, साम टीव्ही, प्रतिनिधी

Sindhudurg Devgad Accident : सिंधुदुर्गच्या देवगड तालुक्यात भीषण अपघात झाल्याची माहिती समोर आली आहे. बस आणि रिक्षा यांच्यात झालेल्या भीषण अपघातामध्ये चौघांचा जागीच मृत्यू झाला आहे. तर एक प्रवासी अपघातातून सुखरुप बचावला असल्याचे म्हटले जात आहे. हा प्रवासी जखमी असून त्याच्यावर रुग्णालयात उपचार सुरु आहेत.

मिळालेल्या माहितीनुसार, देवगड तालुक्यातील नारिंगरे येथे एसटी बस आणि रिक्षा यांच्यात टक्कर झाली. विजयदुर्ग मालवण येथून एसटी बस नारिंगरे येथे आली असता हा अपघात झाला. समोरुन येणाऱ्या रिक्षामधील रिक्षाचालकाचा वाहनावरील ताबा सुटला. त्यानंतर भरधाव रिक्षा एसटी बसला जाऊन धडकली. हा अपघात इतका भीषण होता की यात रिक्षाचा पार चकाचूर झाला.

बस आणि रिक्षा धडकीत चार जणांचा जागीच मृत्यू झाल्याची माहिती समोर आली आहे. तर एक प्रवासी थोडक्यात बचावला आहे. अपघातात जखमी झालेल्या या प्रवाशाला तातडीने रुग्णालयात दाखल करण्यात आले. त्यानंतर त्याच्यावर उपचार सुरु आहेत. रिक्षातून प्रवास करणारे प्रवासी मध्य धुंद अवस्थेत असल्याचा अंदाज वर्तवला जात आहे.