मनोज जरांगे पाटलांच्या हत्येचा कट; आरोपीचा 'तो' व्हिडिओ व्हायरल, संतोष देशमुखांच्या भावाचं कनेक्शन काय?

मराठा आंदोलक मनोज जरांगे पाटील यांच्या हत्येचा कट रचल्याप्रकरणी आरोपीला ताब्यात घेतलं आहे. दादा गरूडला हा पोलिसांच्या ताब्यात आहे.. अशातच त्याचे अनेक कारनामे उघडकीस येत आहे. आरोपी दादा गरूड याचा आणखी एक व्हिडिओ समोर आला आहे. यापूर्वी दादा गरूडचे तीन व्हिडिओ समोर आले होते. मात्र, आता त्याचा आणखी एक व्हिडिओ समोर आल्याने खळबळ उडाली आहे.

बीड जिल्ह्याला हादरवणारा खळबळजनक व्हिडिओ समोर आला आहे. या व्हिडिओमध्ये मस्साजोगचे माजी सरपंच संतोष देशमुख यांच्या हत्येनंतर त्यांचे बंधू धनंजय देशमुख यांना ऑफर देण्यात आल्याचं दिसून येत आहे. धनंजय देशमुख यांना वीस कोटी रुपयांची ऑफर (धनंजय मुंडे,सुशिल कराड) यांनी शासकीय बॉडीगार्ड संतोष जाधव याच्यासमोर दिलं असल्याचा आरोप होत आहे.

यानंतर आमदार सुरेश धस यांनी धनंजय मुंडे यांना गुंतवून टाकू, असे म्हणत धनंजय देशमुख यांची भेट घेण्यासाठी बोलावलं होतं. मात्र, धनंजय देशमुख यांनी जाण्यास नकार दिला. 'माझ्या तत्वात बसत नाही', असं म्हणत त्यांनी जाणं टाळलं, असा दावा करणारा हा व्हिडिओ सोशल मीडियात व्हायरल होत आहे.

या व्हिडिओमुळे जिल्ह्यात खळबळ उडाली आहे. मनोज जरांगे पाटील यांची २० कोटी रूपयांत सुपारी, गंगाधर काळकुटे यांना लोकसभेला २५ कोटींची ऑफर, आणि आता धनंजय देशमुख यांना २० कोटी रुपयांची ऑफर. या सर्व दाव्यांमुळे बीड जिल्ह्यात एकच खळबळ उडाली आहे.

मनोज जरांगे पाटलांना मुंबई पोलिसांची नोटीस

मराठा आंदोलक मनोज जरांगे पाटील आणि त्यांचे सहकारी विरेंद्र पवार यांना मुंबई पोलिसांनी नोटीस बजावली आहे. मार्च-एप्रिल महिन्यात मुंबईतील आझाद मैदान पोलिस ठाण्यात दाखल झालेल्या गुन्ह्याच्या तपासासंदर्भात ही नोटीस पाठवण्यात आली आहे. या नोटीसद्वारे, 'तथ्य समोर मांडण्यासाठी उपस्थित राहुन गुन्ह्याच्या तपासात सहकार्य करावे,' असे सांगत १० नोव्हेंबर रोजी चौकशीसाठी हजर राहण्याचे आदेश देण्यात आले आहे. मुंबई पोलिसांनी जरांगे यांच्यासह एकूण सहा जणांना ही नोटीस बजावली आहे. त्यामुळे आता मनोज जरांगे पाटील आणि त्यांचे सहकारी या चौकशीला सामोरे जातात का? याकडे सर्वांचे लक्ष लागले आहे.