Shiv Sena Crisis : शिंदेंच्या शिवसेनेची नवी खेळी! ठाकरे गटाचं विधानपरिषदेतील विरोधी पक्षनेतेपद धोक्यात?

Shiv Sena Crisis : निवडणूक आयोगाने शिवसेना पक्ष आणि धनुष्यबाण दिल्यानंतर चिन्ह शिंदे गट अधिक आक्रमक झाला आहे. शिंदे गटाकडून आता ठाकरे गटाची कोंडी करण्याचे प्रयत्न सुरु झाले आहे. एकीकडे राज्यभरातील शिवसेनेचे कार्यलये ताब्यात घेण्याचे प्रयत्न शिंदे गटाने सुरु केलेले आहेत. तर आता दुसरीकडे ठाकरे गटाला आणखी एक मोठा धक्का शिवसेनेकडून दिला जाऊ शकतो.

चिन्ह आणि पक्षाच्या नाव मिळाल्यानंतर मुख्यमंत्री एकनाथ शिंदे यांच्या नेतृत्वातील शिवसेनेकडून उद्धव ठाकरेंना आणखी एक झटका दिला जाऊ शकतो. ठाकरेंचे विधानपरिषदेमध्ये असलेले विरोधी पक्षनेतेपद घालवण्यासाठी शिंदेंच्या शिवसेनेकडून हालचाली केल्या जाऊ शकतात.

विद्यमान शिवसेनेच्या आमदारांपैकी किंवा नवनियुक्त अपक्ष आमदारांपैकी विधानपरिषद सभागृह गटनेत्याची नियुक्ती करून व्हिप जारी केला जाऊ शकतो. या व्हिपची अंमलबजावणी शिवसेनेतील सर्वच सदस्यांना बंधनकारक राहील. तसेच या व्हिपचे उलंघन झाल्यास संबंधित आमदारावर कारवाईचीही मागणी केली जाऊ शकते. (Latest Marathi News)

विशेष म्हणजे विधानपरिषदेच्या नवनियुक्त गटनेत्याचा आदेश उद्धव ठाकरे यांना देखील मान्य करावा लागेल. त्यामुळे विधान परिषदेतील ठाकरेंचे विरोधीपक्ष नेते पदही धोक्यात येऊ शकते. परंतु उद्धव ठाकरे यांनी आम्ही वेगळा पक्ष असून निवडणूक आयोगाने आमच्या पक्षाला नाव आणि चिन्ह देखील दिले आहे. त्यामुळे त्यांचा व्हिप आम्हाला लागू होऊच शकत नाही असा दावा केला आहे. (Latest Political News)