Shirdi Saibaba : साई प्रसादालयात आता साई आमटीचा प्रसाद; दर गुरुवारी भाविकांना मिळणार लाभ

सचिन बनसोडे 
शिर्डी (अहिल्यानगर) : शिर्डी येथे येणाऱ्या साईभक्तांसाठी दर गुरुवारी साई संस्थानच्या प्रसादालयात विशेष “साई आमटी” प्रसाद रूपाने दिली जाणार आहे. कमी तेल, कमी तिखट आणि भरपूर जीवनसत्त्वे, फायबर, कॅल्शियम तसेच खनिजांचा समावेश असलेली ही आमटी आरोग्यासाठी अत्यंत उपयुक्त अशी असणार आहे. याचा लाभ भाविकांना मिळणार आहे. 

शिर्डीच्या साईबाबांच्या दर्शनासाठी लाखो भाविक येत असतात. आलेल्या भाविकांसाठी साई संस्थांकडून राहण्याची तसेच प्रसादालयात भोजनाची व्यवस्था करण्यात येत असते. सर्वात मोठे असलेल्या साई प्रसादालयात रोज हजारो भाविक प्रसादाचा लाभ घेत असतात. यात भाविकांना रोज वेगवेगळे पदार्थ प्रसादात दिले जात असतात. यात आता दर गुरुवारी साई आमटी प्रसाद रूपाने भाविकांना देण्याचा निर्णय साई संस्थानने घेतला आहे. 

तीन डाळींच्या समतोल वापरातुन आमटी 

“साई आमटी"ची खासियत म्हणजे तीन डाळींचे अनोखे मिश्रण राहणार आहे. ज्यात मूग डाळ, मठ डाळ आणि हरभरा डाळ यांचा समतोल वापर आमटी तयार करताना केला जाणार आहे. या डाळींचा वापर केल्यामुळे प्रथिनांचे प्रमाण भरपूर राहणार आहे. साईभक्तांच्या आवडीनुसार तयार करण्यात आलेली ही आरोग्यदायी साई आमटी “सात्विक अन्नातून सेवा” या परंपरेचा संदेश देत प्रसादातील चवीला नवी ओळख देणार आहे. 

आजपासून झाली सुरवात 

साई प्रसादालयात रोज हजारो भावीक प्रसादाचा लाभ घेत असतात. या प्रसादालयाची वेगळी अशी ओळख आहे. त्यानुसार आलेल्या भाविकांना आता साई आमटी दर गुरुवारी दिली जाणार आहे. याची सुरवात आजपासून झाली असून दर गुरूवारी हि आमटी प्रसादालयात बनवली जाणार आहे. आज जेवणात हि विशेष आमटी खावून साईभक्तही आनंदी झाले आहेत.