Santosh Bangar : आमदार संतोष बांगरको गुस्सा क्यो आता है? साम टीव्हीला स्पष्टच सांगितलं

Santosh Bangar News : शिंदे गटाचे आमदार संतोष बांगर हे वारंवार आपल्या वादग्रस्त विधान आणि आंदोलनामुळे नेहमी चर्चेत राहत आहेत. अगोदर मध्यान्ह भोजन पुरवठा करणाऱ्या कंत्रालदाराला मारहाण, त्यानंतर कृषी अधिकाऱ्यांना कार्यालयात डांबून ठेवत पीकविमा कंपनीच्या कार्यालयाची केलेली तोडफोड आणि आता थेट राज्याचा कारभार चालणाऱ्या मंत्रालयातील पोलीस कर्मचाऱ्याला केलेली शिवीगाळ. यामुळे पुन्हा एकदा आमदार संतोष बांगर हे चर्चेत आले आहेत.

सत्ताधारी असलेल्या आमदार बांगर यांना अशी वादग्रस्त आंदोलने करण्याची वेळ का येते आणि मतदारसंघातील प्रश्न सोडवताना आमदार संतोष बांगर इतके का भडकतात असा प्रश्न अनेकांना पडलाय, यावर स्वत: आमदार संतोष बांगर यांनी उत्तर दिलं आहे.

मंत्रालयातील पोलीस कर्मचाऱ्याला केलेल्या शिवीगाळीवर भाष्य करताना संतोष बांगर (Santosh Bangar) म्हणाले, 'माझ्यासोबत माझे कार्यकर्ते, पीए मंत्रालयात जात होतो. त्यावेळी पोलीस कर्मचाऱ्याने मला थांबवलं. त्यानंतर माझ्या कार्यकर्त्याने त्यांना मी आमदार असल्याचे सांगितलं. त्यानंतर आम्ही एकमेकांना नमस्कार घातला. त्यानंतर मी माझ्या 'पीए'ला डायरीत नोंद करण्यास सांगितले. त्यानंतर पोलीस (Police) कर्मचाऱ्याच्या समोरून मंत्रालयातून बाहेर पडलो. मात्र, त्या पोलीस कर्मचाऱ्याला गैरसमज झाला. त्या भीतीपोटी त्यांनीही डायरीवर नोंद केली. 'त्या ठिकाणी वाद झाला असेल, तर त्या ठिकाणाचे सीसीटीव्ही फुटेज आहेत. ते तपासून घ्यावेत'

अवैधधंद्याच्या आरोपावर भाष्य करताना बांगर म्हणाले, 'चंद्रकांत खैरे यांना बोलण्याचा अधिकार नाही. चंद्रकांत खैरे काय आहेत, हे सर्व लोकांना माहीत आहेत. खैरे यांची पात्रता देखील नाही. खैरे यांचे आरोप चुकीचे आहेत'.

आमदार संतोष बांगर इतके का भडकतात , या प्रश्नाचे उत्तर देताना म्हणाले, 'राग येण्याचं कारण नाही. सर्व सामान्य लोकांवर अन्याय होतो, त्या अन्यायाच्या विरोधात लढण्याचं काम शिवरायांचा मावळा आणि बाळासाहेबांचा शिवसैनिक म्हणून मी सतत करत असतो'.