School Bus Fees : पालकांसाठी महत्त्वाची बातमी! १५ ऑक्टोबरपासून स्कूल बसची फी UPI द्वारे भरता येणार नाही? मोठी अपडेट समोर

पालकांसाठी अत्यंत महत्त्वाची बातमी समोर आलेली आहे. आता मुलांच्या शाळेच्या बसची फी भरताना UPI पेमेंटचा वापर करता येणार नाही. १५ ऑक्टोबरपासून स्कूल बसची फी UPI ने दिली तर ती स्वीकारली जाणार नाही, असा निर्णय स्कूल बस ओनर्स असोसिएशनने (SBOA) घेतल्याची माहिती समोर आली आहे.

दोन हजार रुपयांपेक्षा जास्त रकमेच्या व्यवहारांवर आकारली जाणारी फी हे यामागचं महत्त्वाचं कारण असल्याचं बस व्यवस्थापनाकडून सांगण्यात येत आहे. त्यामुळे आता पालकांना बसची फी भरण्यासाठी चेक किंवा क्रेडिट कार्डचा पर्याय वापरावा लागू शकतो.

UPI पेमेंटवर शुल्क आकारले जात असल्याचा दावा

सध्या अनेक पालक शाळेची बस फी भरण्यासाठी डिजिटल पेमेंटचा वापर करतात. मात्र, दोन हजार रुपयांपेक्षा जास्त रकमेच्या UPI व्यवहारांवर पेमेंट गेटवेकडून फी आकारली जात असल्याचा दावा स्कूल बस व्यवस्थापनाने केला आहे. काही व्यवहारांसाठी २०० रुपये शुल्क आकारलं जात असल्याचं असोसिएशनचं म्हणणं आहे.

शाळेची सहा महिन्यांची बस फी अनेकदा दोन हजार रुपयांपेक्षा जास्त असते. त्यामुळे प्रत्येक व्यवहारामागे जास्तीचे शुल्क भरावं लागत असल्यामुळे शाळांवरचा आर्थिक भार वाढू शकतो. याच कारणामुळे UPI पेमेंट स्वीकारणं थांबवलं पाहिजे असं व्यवस्थापनाने स्पष्ट केलं आहे.

पालकांनी फी कशी भरावी?

स्कूल बस ओनर्स असोसिऐशनचे अध्यक्ष अनिल गर्ग यांच्या म्हणण्यांनुसार, पालकांनी बसची फी UPI ऐवजी धनादेश किंवा क्रेडिट कार्डच्या मदतीने भरावं, असं आवाहन करण्यात आलं आहे. पण हा निर्णय संबंधित बस व्यवस्थापनाने घेतल्याचं सांगितलं जात असून, सर्व शाळांमध्ये एकसारखा नियम लागू आहे का, याची पालकांनी संबंधित शाळेकडून खात्री करून घ्यावी.